CC24Setembar#15 – Mandi

#15 – Mandi

Al jere cuissà di cetant timp che Nelo nol beveve un tai di vin. E par dut il dopo di misdì, pensant a chê butilie che so cugnât i veve mandât dal Friûl, fevelant di bessôl si ripeteve: “Usgnot a cene ancje se la femine il vin nancje lu cerce e miei fîs no son a cjase le bêf di bessôl. Biadelore che o ai compradis cuatri cjastinis, cussì di sigûr, chel vin, ancje se no soi in compagnie al sarà bon lu stes”. Nol jere tart, ma pai nûi che a jemplavin il cîl, fûr al jere za scûr .
“Karl ven ca che ti met subit il sguinçâl  che a lin jù daurman. A stin un moment, il timp che si cuein lis cjastinis che za o ai metudis dentri il for.”
Za sù lis scjalis si sintivin lis sirenis de polizie, de ambulance e il davoi di dutis chês machinis che a jemplavin la strade di chê grande citât, tant lontane dal paîs d’indulà che Nelo al jere nassût e cressût.
Nadâl aromai  al jere dongje, lis vetrinis des buteghis a jerin dutis lusoradets di lûs di ogni fate e plenis di novitâts pe int che di corse e lave sù e jù distrate pai marcjepîts. Nelo, cjaminant ben planc cul so cjanut jenfri dute che int si svariave scoltant lis vôs dai forescj che ancje in chel an a jemplavin lis stradis de citât: todescs, inglês, francês, americans e tancj marochins.
Daspò che il cjan al veve fat i siei bisugns, tornant a cjase, Nelo al sint, no tant lontan, un om e une femine che a cuistionin. E dut parcè che il prin al jere strac e al voleve tornâ tal albierc, la femine, invezit, plene di morbìn, e varès volût lâ fûr e dentri des buteghis. Sacrament di no crodi, a fevelavin inte sô lenghe, par furlan.
E cence stâ a pensâ dôs voltis, Nelo ur va dongje e dopo vêju saludâts cuntun biel mandi, ur domande: “D’indulà sêso?”. Sintint chel mandi intun lûc cussì lontan dal lôr paîs, tal prin moment chei doi cristians a son restâts cence peraule e dome dopo lât vie il sconciert a chel om i torne la fevele. “O soi di Feagne, par jessi plui precîs di Cicunins”. Chel om, al jere dal stes comun di Nelo che intun prin moment no lu veve cognossût. I torne tal cjâf cui che al jere, daspò che lui i conte che a Feagne al lave a morosâ tal borc di Palût.
“Alore tu sês Gustavo, chel che al morosave cun Mirela, la fie di Sandrin”. Nelo di vê cjatât un so paisan al jere content come une Pasche. Cussì tant che i torne tal cjâf chê butilie che al veve pensât di vierzi di bessôl. E cence pierdi timp in cuatri e cuatri vot al invide Gustavo e la femine a bevi un tai a cjase sô.
Il vin al jere propit bon, pecjât che lis cjastinis si jerin brusadis, ma lu stes la serade e je stade magjiche.  Chel cuartîr di chê grande citât indulà che Nelo al jere lât a vivi, in chê gnot si jere mudât tal borc di Palût, insiorât dai spirts de int di chel borc che mai plui a tornarà, ma che Nelo e Gustavo contantsi i lôr ricuarts a vevin sveât dal lôr eterni sium.
E vele là puare Mirela; Malie, sô Mari; le Cadete, sô none simpri cu la pipe inte man; Sandrin, so pari; infin Siôr Agnul, Lidia, Gjgji Corvin, Angela. Ducj là, ancje lôr, ator ator de taule, soredut cuant che la butilie e je finide e si saludin cuntun biel mandi.

di Nello Malisano (Gjino)
#1757

2 comments