CC24Setembar#07 – Il Contessin

#07 – Il Contessin

Fieste finide. Sot il tendon o restìn in pôcs: cogos, camarelis e cualchi amì. Poiâts i grimâi, une  bire o un spagnolet in man, lis ultimis babis. Si cognossin ducj, e par no lassâsi come cjans e parâ vie la strache, sot vie e partìs une cjante, imparade in cualchi place mediant  chei tre fantats (mandi Frizzi) “E jo no soi un cont…” e cence pensâ, o fasìn cercli, “no ai nuie ce contâ” e ve che partìs la ruede “o soi il plui biel di Udin”… Po mi capoti strac e un pôc bevût e mi slungji par tiere, tant che la zirandule e continue ator di me, “e jo no soi un pote soi dome un marangon”… il gno cjâf e il gno cûr a tornin indaûr di cualchi secul. Lucine! La marchesine Savorgnane le vevi za lumade jù par Marcjât Vieri tant che o metevi a gnûf i cancars dal puarton de sô vile; secje come une gusele, cu la gjiberne celestine e l’ombrenin… discolce! Sgambetave sui spiei des pocis, a pene displovût, come une cisile in amôr. O no je a puest o e à stîl e caratar! Mi plasarès dâi peraule.  “O ai cent mil morosis…”  Carnevâl al è partît, sin tal 1511 e Joibe Grasse si svicine,  te ostarie di Pieri Mortadele o ai savût dal gran bal in cjistiel. Doman le cîr, cuntune scuse o voi a viodi dai barcons  de vile sperant di incrosâle. “Ma jo no vuei nissune , o cerci la fortune”… Soi lât sù cu la scjale di len  fin al prin plan e une ante cjulant mi vierç un spetacul. Si petenave ,in cjamesute, e mi scuadrave tal ôr dal so spieli. Mi mande une voglade e si stapone une spaline… mi clopin i zenoi o sbrissi jù, grampâmi al volo su la roste di une corone, la steme sul puarton. ”mi plâs il biel e il bon”… Ator pe citât si palpe cagnere, vilans rabiôs scjaldâts dai caporions. Biâts che a sperin di tirâ dongje dirits, ma pai parons son come une fete di salam: ti doprin par profumâi la cjase po ti mangjin t un sol bocon.  Mi soi inbusât ae fieste, (chê fantate de cusine si vise ben di me e mi à viert) ”dutis golosis di…”  svelt o cîr la marchesine, le intivi, e le strissini a svual daûr di une puarte  par dâsi une bussade che di tant o bramìn.  Di bot, dilâ tal salon, un grant scjas: berlis, porcos, uçâ di fiers, e trê dincj di un forcjon a passin la nestre  puarte incuarnant  la schene de mê biele, che mi mûr a bracecuel. Lucine! O berli, e un scapolot  a plene man mi gjave dal sium. Sore i miei voi la mê morose, (rabiose) cui siei biei mursiei rosâts. Jeviti su rincojonît! E… “soi dome un marangon”, ma la ringracii che orepresint mi trate come un Princip.

di Stiefin Asquini (Siruc)
#1748

1 comment