CC24Setembar#05 – O spachi dut

#05 – O spachi dut

Il Luna Park al è rivât a Mueç, mi dis une amie intun messaç, cuntune fotografie. O pensi a un colp di mataran, cul jutori di chatgpt o di cualchi app par messedâ imagjins.
E pûr no rivi a fâ di mancul di lâ a viodi… e lui al è lì, pene fûr paîs.
A Mueç nol è mai vignût un Luna Park. O soi sigûr.
Almancul tai ultins cincuante agns che o soi vîf.
Al pâr di chei dai films. Gjostris, musicutis, fritulis, bancarelis cui bonbons, une femine cu la barbe che mi sbelee e un omenut che mi invide a lâ a viodi sbarâ un nanul cuntun canon. Un paiaso mi brinche e mi met in man une sclope, par smicjâ i balonuts che a corin. Soi babio, soi cjaçador. In pôc o vinç un simiot di peluche alt la metât di me e o scjampi, compagnât des blestemis dal paiaso sustât, che mi cjale di brut. O rivi devant dal labirint di spiei. Di piçul no mi plaseve, mi faseve pôre. Ma cumò o viôt altris, dentri, e mi ven gole. Cinc euros o pues ancje permetimai.
O jentrìn, jo e il simiot.
Tal imprin mi viôt dome me: tracagnot, spelât, cu la panze di bire, i vistîts di pôcs bêçs e il simiot in braç, che al pâr riduçâ. Dopo o tachi a viodi altris.
Riche, che in undis agns di matrimoni no i ai mai regalât une rose, ma dome cuars e bausiis.
Luca e Ruggero, che no i ai mai insegnât nuie, nancje il furlan, e che no mi è mai interessât nuie di lôr.
Mê mari, che no savevi plui nancje ce muse che e veve, cuant che e je muarte.
Compagn gno pari, ma parcè che lu odeavi, stant che mi veve fat nassi puar.
No mes disin lôr, chestis robis. Mi cressin tal cjâf cjalant i lôr riflès.
E a mi cres dentri ancje la rabie.
Rabie parcè che no vuei sintîlis, chestis robis. Parcè che o sai che son veris! E alore o spachi dut, o pensi intant che o cîr di saltâ fûr dal labirint.
O spachi dût, o dîs intant che no cjati la maniere.
O spachi dût, o busini disperât cjapant a pugns i spiei.
E si spachin. Joi, se si spachin! O viôt sanc dapardut, che mi incee, ma no mi fermi. Mi buti intor cundut il cuarp, o busini plui fuart, che la vôs mi reste un sbrendul tal cuel. Fintremai che o soi fûr e lu viôt, il paiaso. Mi cjape in braç e mi torne a poiâ su la bancarele, dongje dai balonuts.
E no pues movimi, o fevelâ. Rivi juste a clopâ un pôc lis pipinis.
E o intivi il cuarp di om distirât tal so sanc. La int ator, lûs celestis barlumâ di lontan. Intune sclese di spieli o rivi a viodimi ancje me, cu la mê muse pelose di simiot.

di Milio dai cjans (Vercingetorix)
#1746

3 comments