CC24Setembar#03 – Dulà nino, Cjapitani?

#03 – Dulà nino, cjapitani?

“Dulà nino, Cjapitani?
Dulà vadie le nestre barcje, plene, fraide, sporcje, spauride?”
Vuê e sofle une buere che e tace lis orelis. Jo o voi, di scuindon, sore il puint.
Mi pâr un sium respirâ e butâ vie la puce che o ai dentri e fûr de piel.
Il mâr al è rabiôs e lis ondis a sbatin a fuart cuintri il len.
Il scûr al barufe cul gno terôr.
O voi cul pinsîr al gno vilaç, a gno pari e a mê mari.
O ai vendût dut par puartâ cun me il gno frutin e la mê femine gravide di siet mês.
Nus àn butâts sot, in stive, cul pîs di bevi e la mierde di mangjâ.
E pûr o speri ancjemò di puartâju intun paîs sigûr, bon, dignitôs.
Mi plâs la Italie. Le ai viodude intune cartuline.
O ai i sgrisui pal gno frutin. Lui al à un tesaur: une scjatute di lapis colorâts e une gome. Un regâl di mê sûr, prin di partî.
Lui al dissegne, sore un tocut di cjarte umide, il mâr e la lune sflandorose e lis musis di chei in bande. Int che e glot disperazion, cidine, par no disturbâ i marinârs e il Cjapitani, che a sburtin la barcje, mugugnant e blestemant.
“Dulà nino,Cjapitani. Dulà vadie le nestre barcje?” jo o olsi a domandâi.
Un pataf in plene muse e je la sô rispueste.
O tâs. O scuen tornâ sot, a cuatri gjambis. Il fetôr in stive mi savolte il stomi.
O cjali il gno frutin che al duar, cuntune lagrime sore il nâs di pipin. La mê femine e somee un agnul in spiete.
“Scjampe, tu frut. Tu sês diferent. Puarte sperance, va su une altre barcje. Salviti, almancul tu. Che nô, no podin savè dulà che nus puarte, il Cjapitani”.

di Pierina Gallina (Stele Alpine)
#1744

2 comments