CC24Avost#25 – La ricercje dal studiôs

#25 – La ricjercje dai studiôs

Trentecinc agns di ricercjis par cjatâlu. Dut il patrimoni ereditât dai siei gjenitôrs, doi dai ultins rapresentants di dôs dinastiis di aristocratics une vore abenâdis, plenis di cjamps e terens. Daspò che i vevin sierât il so piçûl centri di ricercje, al veve vendût dut ce che a vevin par vierzi un altri e al jere rivât a saltâ fûr di chel casin. Cussì, i studis a jerin lâts indenant. Darest, un sponsor disponibil a paiâ par cjatà “l’inaltrò” dulà vâstu a cjatâlu? Un concet cussì relatîf, fumatôs, indefinît. Ma lui al saveve, parcè che lu veve viodût, e al saveve ancje che i condutôrs a jerin aghe e eletricitât. Traviers de aghe, lu veve lampât, chel “inaltrò”, cence però rivâ a capîlu: insom insom, chê volte al jere dome un frutin e al jere restât cuasit fulminât. Cumò invezit al pensave di vê lis competencis necessariis par capî, par capî ce che al lere “l’inaltrò”. Si ocupe di colegâ lis turbinis, po dopo al spiete che a si ativin e al moment just al impie la corint. La aghe si agjite e si baline dute, ma intun pâr di minûts e torne cuiete. Dute biele nete, si ferme. Al prove a calumâ il gorc in esauriment, ma si bloche a colp. Si spietave di viodi neri, di viodi alc di stran, lis musis o lis mans dai muarts, miârs di colôrs, cualsisei robe. Ma nol jere nuie tal mieç de aghe. Un nuie cence carateristichis, cence savôr… Al jere dome nuie, alc di impussibil di concepî. I vignî un colp a sec e il sô cûr e lis sôs sinapsis a tonarin.

di Alessio Ecoretti (Nonio)
#1740

1 comment