CC24Lui#22 – Mâl di Afriche

#22 – Mâl di Afriche

Mâl di Afriche. A disin che al sedi un lancûr fuartonon che ti cjape dopo jessi stât ta chest paîs. A disin. Scritoris plenis di bêçs, oms di fortune a trai cu la sclope ai elefants, radical-chic cul balin pes vacancis esotichis e lis fotografiis cul amont ros. A disin.
Mâl di Afriche. 35 agns che o soi impeolât achì, e mai che o vedi vût sen di chest puest. Scjampât vie dal Friûl che no vevi nancje 30 agns. Un invistiment mâl vignût, clamìnlu cussì. Che dî che o vevi imprestât bêçs a chel coion di gno cugnât cul vizi pal zûc nol va ben. Vignût vie cuntune femine che no voleve savênt di lassâ il so mont e une frute di 7 agns che e vaìve pensant ai siei amîs. Il mascjo al è nassût là vie. Sud Afriche. Tirâts sù tra i simiots e i neris, fevelant afrikaans e furlan. L’inglês al è rivât dopo. Par lôr nol è stât nancje un brut vivi, par juste. Nature e int salvadiis. Forsit un tic masse. Al sarà par chel che cumò une e je lade a stâ a Londre e chel altri a New York. O sin restâts jo e la femine. Biadelore in pension. Si podarès tornâ.
Maledet mâl di Afriche. Suiâse de Snia dal Tor, di Puart Marghera, dai fors pe ghise a Gjenue, e dopo cjatâsi cussì. Malaiar. Dôs voltis, le vevi cjapade, chê cragne puartade dai moscjits. Fierone a 40 e scjassadis di fâ saltâ il jet. Viodile peloche par mês, cul respiradôr e ducj chei tubui che ti van dentri e fûr dal cuarp. Ma o vevi rivât a saltâi fûr, il prin colp cuntune voglade zale e discocolade, la seconde volte invezit mi veve ripaiât cun passe vincj chilos di mancul. Ma di lui no si scjampe. Cussì, passe dîs agns dopo, ve che al è tornât. Nol jere mai lât vie, par dîle dute. Plantât tal sanc, come la mê gole mate di Friûl.
E ve che chest scjatulon di savalon si è glotût ducj i miei siums. La mê cinise no, però, chê almancul e podarà viazà fin in Italie, cu la mê femine e chei che nus àn simpri spietât a vaîmi. Cjase, infin. Maledet mâl di Afriche.

di Teresine la çuete
#1710