CC24Avost#10 – Armin

#10 – Armin

Armin di zovin al jere un svanton. Al veve tante di chê braùre! Plui di une volte al veve barufât cun chei altris zovins, vint simpri la miôr. E al faseve furôr cu lis fantatis! Vedran, cuant che ducj i altris coscrits a vevin famee, al veve plene libertât e si jere vuadagnât une brute nomee, lant spes a impaçâsi ancje cun feminis sposadis, ma la vôs si jere sparniçade ator, rivant a la orele dal podestà dal paîs, il cont Volaia.
Armin al jere te M.A.C.A., la milizie antiaerie, vint spes dai alarms. Il cont al faseve il pussibil par pressâlu ordenant ai siei superiôrs di fâi fâ i servizis plui pesants e pericolôs, cussì si deve une regolade.
Cussì Armin lu vevin mandât a Tolmin. Une setemane prime i ribei jugoslâfs a vevin copât doi soldâts de milizie. Par svindic i fassiscj dal presidi a vevin fusilât dîs oms dal paîs, ancje viei; int che e odeave i fassiscj ma che probabilmentri no veve colpe des copariis ai dams dai talians.
Armin al jere tal presidi, simpri sul chivalì. E li al veve vût une metamorfosi: di no crodi che la sô braùre si fos sfantade, come par un strioneç. Al jere deventât une piore!
Al tramave a viodi une ombre dongje di un mûr o cuant che e passave une fantacine cuntun zeut. Al crodeve che dentri e ves une pistole e al sghindave ducj i abitants di Tolmin.
Nol podeve lâ indevant trop. Cussì al telefonà a so pari che i metès une buine peraule al podestà par gjavâlu di li. Al prometeve une vite virtuose, di sposâ prest une fantate e meti il cjâf a puest.
Il podestà si lassâ convinci e al fasè in mût di rilevâ Armin dopo dome un mês di presidi. Tornât cjase, propit par mieç dal cont/podestà, al veve cumbinât in curt un matrimoni cuntune biele zovine dal paîs.
La dì de gnoçade, nancje a un mês de fin de aventure a Tolmin, presint ancje Volaia, al rivà un om de milizie a sunsurà une notizie te orele dal cont. Chel si alçà in pîts comunicant ai astants che tal presidi militâr talian di Tolmin e jere sclopade une bombe, cuant che a jerin ducj te cjasupule. A jerin stâts cinc soldâts muarts, doi ferîts grâfs e e jere lade in ospedâl ancje une femine dal puest capitade li tal moment sbalgjât.
A sintî la notizie Armin al tacà a sudâ frêt e, dentri di sé, al ringrazià so pari e ancje il cont che probabilmentri i vevin salvât la vite.

di Milio dai cjans (Vercingetorix)
#1725

1 comment