CC24Avost#03 – Stricei

#03 – Stricei

Rispietabile Cort Internazionâl di Justizie
Palaç de pâs
L’Aja
Paîs Bas

Sugjet: ostîr/ustîr

Cun cheste letare o scuen fâ presint aes SS.VV. la mê situazion di vitime di angariis linguistichis de bande di un ostîr/ustîr trist. Tristonon.
O ai za vût segnalât il problem a:
– il president dal mont
– il president de Europe
– il president dal Friûl
– mê agne Berte
Nissun al mi à mai rispuindût. Dome mê agne mi à dit ‘Ven ca, frut, che ti doi un biscot’. E alore.
Chest ostîr/ustîr al vûl che lu clami ostîr, ma jo o ai simpri dit Ustîr, parcè varessio di contentâlu?
E cumò, piês cun piês, al ven a pretindi di insegnâmi la peraule stricei!
Ce robe ise? Si dîs STRECEARIE, sâr Ustîr!
O domandi scuse se mi lassi puartâ de fote, ma cuant che la fote e je fote, alore la pignate e va parsore!
Sârs de Cort! O vês di condanâ l’Ustîr a la pene massime! Ce conte si puedie mai scrivi sul stricei, o vuei dî su lis streceariis, plurâl, mai viodude une strecearie ugnule! E alore ce vegnial a dîmi di fâ robis fûr dal vade!
Par no fâus pierdi timp us dîs jo ancje il tip di pene che al merete: une bic nere cence tapon. Cussì al podarà scrivisile di bessôl la sô conte.
E a mi, par dams morâi, une flascje di Tocai fresc. Une flascje, no une butilie. Che la bevarai, cuant che al plûf, sote des streceariis! E o clamarai dongje ancje l’Ustîr par che al bevi cun me. Jo il tocai.tai, lui lis streceariis. O ben, se al à miôr, il stricei!

In fidance di un bon acet, cun salûts di rispiet, al si firme
L’***

Di chi che o soi jo, ai 5 di avost 2024

di Laurin Zuan Nardin (Ippogrifo)
#1718