CC24Avost#01 – L’om dal cûr colôr infinît

#01 – L’om dal cûr colôr infinît 

             
Al è un om su la sessantine.
Si clame Lino e, intal cjâf, al à une enciclopedie di motôrs.
Di mistîr al fâs il mecanic.
Al à ancje un fi, Denêl, di 36 agns. Ogni Istât, ai 19 di Lui, ju finìs.
Par lui, in chê zornade, Lino al met adun une grande fieste e al invide ducj.
In prime file, però, i fantacins e i operadôrs de “Nestre famee”.
Prins, ancjemò prin de prime file, lôr, i amîs di “Gjonde”: i amîs plui cjârs di Denêl.
Al è in gjambe, Denêl: al sa dut e, salacor, ancje alc di plui, sore la religjon cristiane, la Bibie e il Vanzeli.
Si definîs “predi”, ma mighe par veretât, par plasê.
Inte sô cjamarute, al à inmaneade la “canoniche”, cun ce sorte di paraments e dut ce che al covente par disi messe.
Cuant che al cjate cualchi persone, i domande il non e, daspò, i imbine il sant just, cun vite, muart e miracui.
Lui al è contenton de fieste che so pari e sô mari i regalin ogni an.
Parcè po?
Eeeh, pe mongolfiere – che e rive di Milan nuie che mancul – une abondante mangjadorie, musiche, bal, motos e fûcs artificiâi.
E, daspò, Denêl, cuntune ridade di lune a falcet, al cjante une melodie pe Madone: “Ah, soi propit content” e ti cjape a bracecuel, ancje cence cognossiti e ti invide a contâ lis stelis.
“Al è dut biel, là parsore” al sigure. E al è masse biel crodiji!
Cence fâsi viodi, so pari, Lino, l’om dal cûr colôr infinît, cun fâ ruspiôs, ma dolç, lu rimire.
Lis pleis dal so ridi a son fodradis di vilût.
Lis sôs pipinis e lusin di rivoc, tant che lusignis inamoradis.

di Pierina Gallina (Stele Alpine)
#1716

1 comment