CC24Lui#19 – Misdirection

#19 – Misdirection

Ancje se nol jere cinês o asiatic, Fu-Manchù al è stât l’ilusionist plui grant de storie de magjie. Al podeve fâ un “efiet” cun ogjets piçui di dongje, a pôcs centimetris e un altri cu lis cjartis di zûc, o pûr grancj spetacui tun teatri des grandis citâts. A jerin lis primis decadis dal secul XX daspò de grande vuere. I spetacui di magjie dal disevot a vevin une estetiche orientâl, a puartavin dongje la int che e voleve netâsi dai ricuarts dai orôrs de vuere, ancje par art di “Misdirection”. Cheste art al è un insiemi di struments une vore ben ricercjâts e testâts, metint dongje il colôr, vistîts, musiche e imprescj dissegnâts par che a sedin fûr dal normâl. Par creâ magjie, par puartâ un sens di trassendence.
Un al crôt che tun moment, il spirt al pues dispeâsi de materie, dai dolôrs e dai aviliments tant che l’ilusionist al pues sfrancjâsi des manetis biel jessint fûr dal baûl. Si disvilupe un sens di sturniment tal çurviel.
Par rivâ a fâlu si dopre la “Misdirection”, ven a stâi, moviments cun puartament che a mostrin une robe che no je, o che e fâs fente di jessi une altre diferente.
La estetiche orientâl di Fu-Manchù e lave dongje la sô magjie vistît cui kimonos. In veretât, si clamave David Bamberg, al jere di une gjernazie di siet dissendents di mâcs, fi di Theo (Okito), creadôr di ilusions e aparâts par Houdini e tancj altris de ete di aur de magjie. Al jere cressût jenfri chei mestris de ilusion.
Tal spetacul grant al faseve un efiet che si clamave “Jade – Il ladron di Baghdad”, fat di Okito.
E jere une custodie in pîts cuntune base e un bus tal centri, dentri al jere un veri tant che une piere preziose finte. Si traviersave il bus cuntune gusiele e une curdele, in mut di no podê gjavâ il veri sbrissantlu cence strissinâ la curdele.
Fu-Manchù al sfidave al public a jessi atents, parcè che lu varès robât cence strissâle, e nissun si visarès, anzit ducj a podaressin viodi il so segret.
In chel moment, dal prin plan de platee, si sintive un davoi, un ciulâ, un berghelâ. Un rifletôr al faseve viodi dôs personis che a lotavin sul pareman parsore il vueit. Ducj a seguivin la bataie fin che un di lôr e colave te platee!!!
Al jere un pipinot lizêr di peçot. La musiche de orchestre e faseve un pic, e il rifletôr e zirave par mostrâ Fu-Manchù che tes mans in alt, al veve il “Jade” molât fûr de custodie. A vevin pierdût l‘oportunitât di cognossi il segret.
A son pocjis imagjins dai siei grancj spetacui. Cualchidune dai prins films fats in Messic, cumò a restin lis storiis dai spetacui, e i insegnaments de “misdirection” par puartânus a chê dimension dulà in cui si va fûr de percezion.

di Gato
#1707