#15 – Afriche
Une dì cualchidun sigûr ti domandarà di indulà chi tu vegnis, cjalanti in muse o scoltant il sunôr dal to non. Lu domandin simpri, cuant che a àn pôre, o cuant che no rivin a capî. Tu cîr di perdnonaiu. Bisugne compatiiu, plui che no odeâiu. E mi pâr strani, dal moment che la lôr storie e je stade tibiade propite come le nestre, sburtantju fûr di cjase, a disledrosâsi. Parons dome che da la memorie. Benon, se e cuant che al capitarà, tu rispuint che tu sês “di là da la aghe”. No je une bausie. Di sigûr ti cjalaran ancjemò plui smaraveâts, e pensaran che tu ses mate o che tu ju stâs cjapant pal cûl. E pûr cualchidun, plui bulo di chei altris, al varà di sigûr un lamp di intuizion dentri dai voi, e i vignarà di ridi. Alore tu continue, insist, e spieghe che tu sês furlane propite come le Glesie di Acuilee, che ven di chel stes continent dai tiei antenâts, propite come chel Marc che lôr a venerin tant che un Sant. E se saran pronts a scoltâti alore zonte che to nono al jere un vuerîr e che sô fie, tô mari, e à scombatût cuintri da lis ondis cul stes coragjo che al veve lui cuant che al leve a cjace di un leon. Dute la gnot, e à combatût, restant sul pêl de aghe, tignint te, involuçade intun fagotut, simpri adalt, par no fâti inneâ. Contiur cheste storie. Dome cuant che tu varâs finût pronunzie cun braùre il to non: Afriche. Che in te lenghe dai tiei basavons al vûl di “polvar”. Dal moment che chest o sin ducj cuancj, noaltris umans. Grignei di savalon lizêr, puartâts lontan dal aiar.
di Torototele
#1703
