CC24Lui#12 – GMC

#12 – GMC

Cui che al dîs che e je dome une liende.
Cui che invezit le met tes storiis plui bielis dal continent asiatic.
Trê muredôrs furlans.
Fausto Galas, Gilberto Meroi, Virgjinio Codut.
Puartâts in Cine dal lôr impresari edîl a tirâ sù mûrs, cun paiament anticipât.
Cjapâts i bêçs, il capo al jere sparît tal fresc de Siberie, inamorât di une tatare a tirà sù bilitis par vendi lis pelicis, lassant i trê muredôrs al lôr destin. Si sa, i capos a voltis no cjalìn in muse a di nissun.
Muredôrs e furlans! I trê no rivavin a stâ fers! Il prin al puartave modons, il secont al messedave cjalcine, il tierç al travuardave cul spali.
Dopo vincj agns i lôr fîs, cun cualchi nevôt, a son lâts a cirîju.
Ju àn cjatâts in Mançurie. A vevin a pene finît la Muraie plui lungje dal mont.
E di ben che ju àn cjatâts. A pensavin di tornâ indaûr, dopleantle.
Tal inizi dal lunc sbarament e je une targhete di fier cun scrit GMC. Ducj a crodin che la sigle e corispuindi a Grande Muraie Cinese.
Dome nô o savìn, invezit, che e stâ par Galas, Meroi e Codut!

di Massim Furlan (Brene Sfolmenade)
#1700