CC24Lui#05 – Il trotul

#05 – Il trotul

Vuê o vin fat une biele corse inte nêf. A son dome 5° sot zero. O soi rivât prime jo. Mi soi meretât un premi: une doce lungje ben cuatri minûts!
Chê altre dì o sin lâts lontan, cu lis slitis, propit fin al Pôl Sud. Tal pont esat. O sin te biele stagjon, cuant che il circul polâr antartic è spostât in devant viers dal Soreli. Insome, e je Istât.
Mi soi metût propit ta chel puest e o ai pensât di jessi dome jo fer, o cuasi. Dut il rest dal mont al zirave intor di me a part il Pôl Nord, di chê altre bande de Tiere.
Voaltris, in Friûl, no si rindês cont ma o corês a une velocitât alte, sui mil e dusinte chilometris a la ore! E o crodês di jessi fers.
O varessis di imagjinâ di jessi su un avion. Inte cabine, a velocitât costante, us samee di jessi fers ma provait a cjalâ fûr e o viodarês dut il paisaç a spostâsi. Però no sês voaltris fers e il paisaç a spostâsi. O sês voaltris in moviment. Ve, o ai fat un parangon par fâus capî. Di norme la int no si rint nancje cont di jessi suntune sorte di trotul, la Tiere, che e zire, e zire, e zire.
Il nestri lavôr di ricercjadôrs no nus da recuie. O sin simpri pronts a misurâ, a fâ busis, a scrutinâ, a fâ rapuarts. Purtrop la situazion in Antartide e sta deventant simpri plui grivie a cause dal riscjaldament di dute la Tiere. O stimi che tra cualchi desene di agns la calote polâr e sarà ridusude di tant e tantis localitâts sul mâr, in dutis lis cuestis dal mont e su lis isulis, a saran sot aghe.
Chel pôc che o vin cirût di fâ come umans par ritardâ il procès al è stât dibant a cause di un ciert mût brut di fâ politiche. Cumò al è masse tart par vaî il muart.
Al è brut di disi.
No si salvarìn.

di ?
#1693

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît