La puce di urine secje i insiorave lis narilis dilatadis dal fum e dal so vigôr.
Inte sfese di un dint devant – al jere colât intun timp cence memorie – jê e meteve dentri e tirave fûr la lenghe.
Lis papilis e someavin sdrois seneôs di piel: chê neonade, la sô preferide.
I agagns dal desideri e sbatevin i siei sens.
Jê si incjocave di plasê, tossint a bugadis, e sgargaiant cuntune ande propit civiline.
Il tant morbeç i pontave lis cuestis de schene. Il cûr al maridave la libertât di copâ chei cuarpesei.
Che a vevin di jessi a pene vignûts al mont, di pocis oris, miôr se di pôcs minûts.
Cicinôs.
Cjalts.
E, jê, e scugnive lustrâ lis mans cul lôr vaî e bevi il suc fresc.
E cjarinaiu – lentamentri – cul fîl des ongulis e sù e jù fin dentri ogni morbide plee.
E botonai lis palpieris – palidis tant che nûi cjocs di bombâs – cun la palme sudadiçe e petenai lis ceis.
Jê ju tignive cui dêts tant che ciandelis impiadis e lis ongulis come curtìs a pene uçâts.
Daspò, cul stomi solevât e lis spalis dentri al cuel, cul rispîr ingrispât, jê e ficjave la lame subit insanganade a sbruf.
La cjâr di spongje si lassave filetâ, mugnestre.
E il rubin des venis al sconfinave e al slapagnave e si ingrumave tant che flum vuarfin di rostis.
E al coreve, par dut, cun dissens di fii di ingjustri colôr petroli.
Alì si inneavin furmiis e rais.
La sassine e gloteve dolôr e plasê.
E gomit nô volût.
Intant che intal pet si impiave la rugnade potente di bestie umane, sglonfe di onipotence.
di Pierina Gallina
#16**
