CC25Mai#17 – Une invenzion discomude

#17 – Une invenzion discomude

La svee e sune. Macôr al cîr di jevâsi sù, ma il jet al è plui svelt e i ingranaçs a si metin subite in vore par puartâlu tal necessari. Nol rive a movi un dêt che i braçs mecanics a lu poin par tiere denant dal spieli, in pîts, i vierzin la bocje e i sgnachin il spacetin di dincj in bocje. A netin ben ben, dopo lu fasin pleâ e spudâ tal lavandin. A i tocje ancje sentâsi sul gabinet, cence fâ nuie, viodût che nol veve bisugne, ma il mecanisim lu môf sul bidè par netâlu istès. Cinc minûts, e subite i tirin vie il pigjame par cambiâlu cuntun vistît elegant. Al scugne, po, lâ in cusine, par fasi poiâ su le cjadree. I butin denant de muse la gulizion cjalde. Ancje cheste volte i braçs eletronics no i lassin il timp di bati cee che i vierzin la bocje e i ficjin la brioche bulinte fin tal gosarot e une tace di lât bulint e ven subite daûr. Nol à il timp di fâ nuie che subite lu fasin alçâ e i parin dentri i braçs tes maniis de sô gjachete. Un rip tal cûl e al finìs fûr de puarte. I cjossui eletronics a si tachin aes gjambis: cumò al à di lâ a vore, simpri compagnât de sô invenzion. Pecjât, al pensà, cu lis lagrimis che i colavin jù sui smursiei come roiutis di aghe, che lu vevin licenziât. Ma, cuistion ancjemò plui problematiche, nol rivave a meti a puest il sisteme mecanic e cussì pai braçs il dran dran programât al jere restât il midiesim. Un dran dran che, par lôr, al veve di restâ simpri chel. E nol jere vonde: lis batariis e lavin indenant a energjie solâr e al veve programât ancje un par di oris in dì tal viert, par la ricjarie, che a fossin zornadis di ploie o di soreli. Lu spietave dal sigûr une biele polmonite.

di Alessio Ecoretti (Nonio)
#1647

1 comment