CC24Mai#22 – Tantepôre e il drâc

#22 – Tantepôre e il drâc

A Tantepôre a jerin a stâ doi popui che no si sopuartavin. Di une bande a jerin i Martans, ven a dî i fîs dai fîs dai fîs de regjine Marte, e di chê altre i fîs dai fîs dai fîs dal re Agnul, i Agnulins. Martans e Agnulins no podevin viodisi, cussì come che a so timp si jerin odiâts il re e la regjine, che a jerin di dôs fameis aversariis.
I fruts Martans a cressevin scoltant storiis orendis sui Agnulins, sul fat che a jerin triscj e che i puçave il flât. I fruts Agnulins a scuele a imparavin che i Martans no vevin sintiment, e che cun di plui cuant che a pedeavin a davin la colpe a chei altris. I Martans e i Agnulins a jerin a stâ tal stes puest, Tantepôre apont, ma no si cjatavin mai parcè che a vevin fat sù un mûr alt e grues che al divideve in doi la citât. No dome: a vevin dôs scuelis, doi ospedâi e doi municipis diferents.
Une dì a Tantepôre al rivâ, svolant, un drâc. Al jere grant, ros e al nasave di solfar.
I fruts, Martans e Agnulins, no si maravearin masse. I gjenitôrs, i mestris di scuele e fintremai i bibliotecaris invezit a jerin scaturîts. Il drâc al sielzè di fâ un nît propite parsore dal mûr che al divideve la citât, mostrant un ciert estri pai zûcs di ecuilibri.
Il Sindic di Tantepôre dai Martans al tacà a dî che il drâc al jere trist e che lu vevin clamât i Agnulins, e tal stes timp (nancje a fâlu di pueste!) il Sindic dai Agnulins al pandè la version contrarie.
Il drâc, che al jere babio e espert di lenghis, al capive dut. Ju cjalave dil adalt, cul cûl poiât sul nît, e intant al pensave che i doi popui a jerin propite totolòs.
Fortune che a Tantepôre no jerin mai stadis inventadis lis armis, si no cuissà ce che al sarès sucedût! A son passadis dôs setemanis e Martans e Agnulins a son ancjemò lì a dâsi la colpe pe rivade dal drâc… cence rindisi nancje cont che il drâc tal fratimp al è svolât vie! Stûf dai lôr tarlecs e cuntun segrêt in sachete: ancje ai Agnulins i puçave il flât cualchi volte, e ancje i Martans, se a podevin, a davin la colpe dai lôr pêts a chei altris.

di Margarite Cogôi (Glorious Grene)
#1652

1 comment