CC24Mai#16 – Intune gnot di lune plene

#16 – Intune gnot di lune plene

La citât a jere vueide, dome ogni tant su lis stradis e passave cualchi machine. La int, soredut pe stagjon tant cjalde e jere lade tai lûcs di mâr no tant lontans.
La gnot e jere clare e sul marcjepît une legre clape di fantats e fantatis, tal cidinôr di chês stradis che someavin bandonadis, a cjaminave viers un zardin indulà che si balave par finî in gjonde chê zornade di fieste.
A cjaminavin ben planc, contents de lôr zoventût e dal amôr che al jemplave i lôr cûrs. Une ligrie che invezit si jere studade tai voi di Marie. Il so cûr di un pieç nol bateve, o forsit non veve mai batût par chel sintiment che soredut in zoventût ducj a àn cognossût.
Rivâts tal fresc di chês plantis che jemplavin il zardin, bielzà sù la piste di bal i musicants a vevin tacât cui lôr struments musicâi.
A pene sentâts dongje chel breâr, tancj fantats viodint che Marie a jere bessole le vevin invidade a balâ. Nie ce fâ, chei oms ancje se ninins o parcè che masse bas, masse alts o masse bionts o neris a ducj i veve dit di no.
E intant che e cjale lis sôs amiis che ancje lôr cui oms a vevin tacât a balâ, Marie no tant lontan e viôt une man che le salude. Di cui jerie la man di chê femine che e coreve viers la sô direzion? Dome cuant che e sintì la sô vôs e capì che e jere chê di Mercedes. Chê frute, cumò une femine, che fin de prime zornade di scuele si sentave tal stes banc cun jê.
«Sêstu tornade? Indulà sêstu stade in ducj chescj agns che si sin pierdudis?»
Contentis di riviodisi, intant che si contavin il timp aromai passât, i musicants a vevin intonât un biel valzer. Chel bal che fin di frutis a balavin insiemi tes primis fiestis che a fasevin cui amiis. E cence pensâ dôs voltis, velis là tal mieç de piste che a voltizavin vie, sburtadis des notis dolcis di chê sunade.
I voi di chês dôs feminis neris e turchins in armonie ai lôr biei cuarps a pene involuçats in vistîts elegants e colorâts a svolavin vie lizeris come paveis.
Par trop che a jerin bielis e lizeris a someavin doi agnui. Ducj i balarins si jerin fermâts par cjalâ chei doi cuarps maraveôs, incolâts da dolcece dai lôr voi che si cjalavin .
Marie e Mercedes si jerin inamoradis e ancje la lune che e zuave cun cualchi nûl ur cimiave par augurâur tante passion e amôr in eterni.

di Nello Malisano (Gjino)
#1646

3 comments