CC24Mai#10 – Rufus

#10 – Rufus

Lu vevi cjatât tal mieç de strade, biel che o cjaminavi, chel gjatut blanc e ros. O crodevi che al fos muart ma no podevi lassâlu li a fâsi sfracaiâ des machinis. Lu vevi cjapât in man e al jere inmò vîf!
Al veve dôs busis intal pet, segn che cualchi bastart carognôs lu veve torturât cuntune forope!
Lu vevi puartât li di Fides, la vecje gjatare. Chê e veve clamât Mercedes, la veterinarie. Lu vevin curât. Si jere salvât. Lu vevi adotât. Mi veve tignût compagnie par cinc agns. Cumò però no lu cjati plui.
Discomparît.
Dulà saraial il gno Rufus? Al è un misteri.
O ai jemplât ducj i pâi de lûs dal paîs di cartei cu la sô foto e il gno numar di telefon.
O ai domandât a ducj chei che o cognòs se lu vessin viodût: nuie di nuie!

Vuê di matine a buinore o ai scuviert ce fin che al à fat Rufus: mal àn copât! O soi juste passade dongje di Cheng.
Si fâs clamâ “Cenciunfranc”, chel omenut fals che al vai simpri il muart pe crisi dal so ristorant.
Jo o sai che al messede bêçs cun ativitâts clandestinis. Al sfrute i operaris intun laboratori sot tiere. Il ristorant al è dome un parevint. E sì che il vecjut al à un aspiet afietôs; al à muse di bon. Mi ricuarde un pôc Ho Chi Minh.
Insome, Cheng, cheste no tu vevis di fâme! O ai cjatât la piel di Rufus che e saltave fûr di un bidon des scovacis juste devant de tô betule cragnose! E jere intun sacut trasparent cun in soreimpression des scritis par cinês. Plui clâr di cussì!
Cheng, carogne! Strani che no tu vedis riciclade la pelice pai vistîts dal to laboratori.
Intant tu âs servît Rufus tal to ristorant! O tu lu varâs mangjât tu. O ai di svindicâmi!

Uhm, a pensâ ben no je une prove che al sedi stât lui. magari i àn butât la piel tal so bidon par dâi la colpe. No. Mi pâr impussibil che nol sedi stât lui.

MIAO MIAO PRRR PRRR
Rufus!
Tu sês tornât! Tu sês vîf! Ma alore chê piel tal bidon? No tu jeris tu! Forsit un to puar zimul de colonie feline di Fides la gjatare?
Ah ce contente che o soi! Mi samee di tornâ a vivi!

di Derna
#1640