CC24Avrîl#27 – Loopus in flabe

#27 – Loopus in flabe

Par câs o soi colât dentri di un viaç permanent, une sorte di cicli continui viers il alt e il bas.
O drinduli intune matriç di transizion in direzion dal cîl o dal abìs fin che dibot la clessidre si ribalte e il mudament al cjape formis strambaladis.
Si pues di che le mê esistence e je tant che un eletrocardiogram cence diagnosi.

O soi a vuidâ cence patent, e nancje control e o fâs fadie a tignîmi sù. Ogni tant o loti par un pêl e subit daspò mi lassi lâ, puartâ vie pe corint. A ogni mût tal rivâ no resti masse timp, tant che dôs calamitis cuant che si metin dongje cul compit di impedî il tacament, da li, mi butin vie.

Te cime, propit su la flôr, se o decidès di lâ sù sul gno ego, subit la vite mi met in rie e cuntun scufiot e o coli sul paviment. Invezit cuant che o voi jù tal scûr, cence indizi dal dulà, une man cence muse mi gjave vie di chê cundizion.

O voi ator in continuazion cence podê disarmâ bagai, cu la sperace di rivâ a capî il parcè che no ai control o pûr a cjapâ un fregul d´intindiment dal mont che o ai ator.

di Lenart Gjavedon (32)
#1625

1 comment