CC24Avrîl#26 – Splatter

#26 – Splatter

Sintîso il respîr pesant e fuart daûr di voaltris, ma cuant che si zirais no cjatais nissun. Il terôr us cres dentri, intant che a scomençais a capî di no jessi di bessôi, tal mieç dal scûr. Un moviment fuart di aiar us sburte cuintri de parêt ma il colp nol rive a sfracaiaus. Rivais istès a traviersâ la stanzie cuntun salt, sghindant i mobii come s’al fos un percors di gincana. Un altri moviment di aiar us segnale une gnove raclade, a vueit ancje cheste ma al rive a sburtaus viers dal paviment. Cuntun sfuarç fûr di misure si buitais par adalt, ma nol è avonde: la tonade cheste volte us cjape juste, ad in plen, e li conzunturis us crichin par dut il cuarp, cualchidune pardabon a si romp. Butâis par tiere, sacodâts dai moviments spasmodics e mieçs sfracaiâts, no us reste che spietâ la prossime slepe che us ridusarà intun grum di sanc: e i vuestris frutins? Lassâiu cussì di bessôi? Il vuestri ultin pinsîr al è: je dure la vite dai moscjins.

di Nonio

#1624