CC24Avrîl#22 – Flamis

#22 – Flamis

Si jeve une vôs potente.

«Voaltris, scrofâts sui scagns dal podè,
che prin di pontâ il dêt, lu vongolais par aiar,
viers il cîl,
jenfri l’insegnament e la cridade,
berghelant a fuarce il vuestri precet,
detât al scrivan cul massanc te man.
Voaltris mi copais, achì in place, denant di cheste marmaie instupidide.
Mi sierais la bocje, cul fum penç de vuestre sapience,
mi consumais cul fûc velegnôs de vuestre leç.
O vês inmaneât une sentence sclete, precise,
tirade fûr dal vuestri libri pustiç, malsestât, imbombât di sanc.»

«Voaltris o stropais la mê peraule, il flât, la sium.
Ma visaitsi: ni il curtìs plui uçât, ni la cuarde plui intiessude
a podaran studâ la fuarce dal gno pinsîr.
E chest lu savês.
Une debile braùre si messedarà cuntune pôre dure a sfantâsi.
Si rosearês par dentri, za di usgnot, a pene studât il boreâr di cheste muart!»

«E voaltris, invezit, puars mortâi?
O sês impins come gjambis di soròs prontis a pleâsi!
Cumò mi sbeleais, mi spudais intor, mi patafais i smursiei…
Ve ca il gno test: no stait a fidâsi!
Pensait cu la vuestre crepe. Cjalait cui vuestris voi!
Si dîs messe cuntune man e si sledrose la spade cun chê altre!
Si cjape a bracecuel il derelit, cerclantlu cul piviâl che al glingline aur e arint!
Voaltris o cognossês il Divin.

Lu sintîs dentri de cjar e dai vues, plui di ogni altre creature su la tiere.»

Si sune la trombe.

Si impie il pavêr.

Flamis.

di Massim Furlan (Brene Sfolmenade)
#1620