CC24Avrîl#18 – Riproduci

#18 – Riproduci

Tu sês sentade in cjase tô, bessole. Tu âs inmò sium, un plat di lavâ,
Tal cidin dal cricâ dì dulà che il sôl uciel a cjantâ al è il camion dai refudums che al sdrume il veri te sô panze, simbul dal mont che al mastie se stes.
Come il to. Come te. Come ogni robe.
Tu che cumò tu finissis di bevi chel cafè che nol sa di nuie, tu ti lavis la cjicare par usgnot, tu ti viestis sielzint i colôrs, tu spietis che si fasi chê ore sburtant la vite di chei altris cul poleâr, sul to telefonut.
Al à dut di sucedi e dut al è za sucedût. Ma no par te.
Par te nol sucêt nuie.
No tu sarâs cun chê int, ta chel bar, ta chês tacis, ta chê fieste, ta chês scarpis che a van inta chei puescj maraveôs plens di vert e aghe e cîl e musichis e flôrs e ridadis cence padìn.
Tu tu vâs a vore.
No ti plâs chel lavôr, chê int, chei oraris, chês ridadis cence padìn.
Ti pain pôc e pôc ti presein. No tu valis nuie par nissun, soredut par te.
E no tu âs un talent, alc che tu sâs fâ miôr di altris.
Ti plasarès scrivi poesiis, dissegnâ feminis e arbui, cjantâ a vôs alte, fâ l’amôr cun cualchidun di amâ, cjaminâ planc sot dal amont tal mieç dai cjamps di vueli e des rosis di saût. Distirâti intun prât a fâsi lecâ dal soreli, intant che tu fasis sù une golaine di margaritutis e tu ciris di dâi un non a ogni nule.
Ma no tu lu âs mai fat. No tu lu fasarâs. No tu âs mai fat nuie par fâlu.
Nancje di domenie, che tu podaressis.
Tu sês nassude femine, ma nol è par chel.
Tu sês nassude puare, ma nol è par chel.
No tu sês biele, mai tu lu sês stade. Ma nol è par chel.
E cumò tu pesis masse, tu sês invecjade, no tu âs bêçs in bande, ni un om, un fi, un murôs, une amie di vite. Tu sês nassude chenti, in dì di vuê, ma nol è nancje par chel.
Tu sês tu. Tu sês come ducj.
Al è par chel.
Tu ti sentis bessole a bevi un cafè che nol sa di nuie, te stesse cjicare di vuê matine, sute e lavade. Come te.
Tu âs cualchidun di clamâ se tu sbrissis pes scjalis, ma nissun par dîsi che cumò ti plasarès cjapâti sù e lâ a viodi il mâr, scoltant Street Spirit dai Radiohead devant di lui.
Tu impiis la television. Tu ciris alc di cjalâ.
Une gnove serie ti pâr che ti podarès plasê.
Episodi Un. Stes minûts dai tiei agns.
Tu frachis Riproduci.

di Atile
#1616