CC24Avrîl#08 – Carnevâl

#08 – Carnevâl

“Ah ninine, ce ben che tu stâs, dimagride”. I ringrazi e i sorît, di umil vedue che e cîr di sorevivi.
Il gno cuarp al jere neri e flessuôs cuant che i vevi disevot agns e i balavi discolce su lis splazis di Canoa Quebrada, in Brasîl. E tu di agns tu ‘nt vevis cuasi cincuante, e mans pelôsis e impazientis, ma encje se tu jeris brut tu mi sameavis bon, e dolç cuant che tu mi cjareçavis lis cuessis. E o ai cjapât un avion par vignî a vivi inte tô tiere glaçade, in Cjargne, e tu mi âs dineât di conossi i paisans, parcé che o jeri masse provocante, e tu mi’nt âs dadis, ah se tu mi’ntâs dadis di pachis. Sierade in cjase, a balâ di bessole par no deventâ mate, podint jessi dome par Nadâl, Pasche e Carnevâl. E cuant che o ai tacât a ingrassâ, tu âs començet a lâ cu lis trois – chês veris – e a tornâ a cjase cul lôr profum intor, e jo a mangjâ di bessole in cusine, e a vaî.
Inmò un chilometri e dopo o ai finît l’alenament, par vuê. Al fâs cjalt pe stagjon che e je.
A carnevâl tu âs fat fieste cui tiei amîs in cjase, cjapantmi pal cûl parcé che o soi grasse, e no sai coghenâ, ridint cun lôr, bevint. E lôr a àn tacât a mascarâsi, e tu tu mangjavis come il purcît che tu sês, robis di aspuart, cençe savôr come te. E tu sês lât in bagn, sintintji pôc ben, purcit. E cuant che tu sês tornât tu vevis la muse rosse e i lavris e lis mans sglonfs, e i amîs a ridevin e ti batevin sù pe schene contents, ce biel truc, tu sameis un mostri, e dopo Sandri si è visât che tu jeris alergic a lis mandulis, e mi à cjalât, e jo i ai alçât lis spalis, vaint, intant che tu tu murivis scjafojât sul palment.
Soi brave a vaî. O ai fat tant alenament intant che o jeri di bessole.
A proposit di alenament: i tiri il flât, lassi jessi il flât dal pet. La mê diete, dopo le corse, e dîs di mangjâ sucar, e mandulis. I mastii ben, a son dolcis, dolcissimis.
Ah, ninine. Ce ben che tu stâs, dimagride.

di ?
#1606