CC24Avrîl#02 – Vôs di… coridôr

#02 – Vôs … di coridôr

Jo no soi une caghesot, ma mi è capitade une di restâ!
No soi di prin pêl, lavôrs precaris in struturis sociâls, ma daûr de scuele de mê famee no mi displâs dâur une
man a chescj nonos dislidrisâts. Cussì mi capite di cumbinâ un gnûf puest di vore sù pes culinis de Morene.
Solitudin, alcolisim, alzheimer. Biâts mai lôr.
Dut câs, struture metude a gnûf, cusine e sale a la mode, eletrodomestics inteligjents.
Prin turni di gnot, bessole, nûf di “Lôr“ di vuardeâ. Fat il zîr di ronde, mi senti, provant a fâ amicizie cun chest gnûf silenzi.
Cafè pront, telefonut in sachete, mi cjali un pôc ator.  Di bot al sgrasaie il vecjo citofon! Une corse e o cjapi sù. “Pronte, cui isal?” Silenzi…
Passin dôs oris, al torne a sgrasaiâ. “Pronte cui isal?”
E te orele, come tal bombâs, une vôs: “Se tu âs bisugne di alc jo soi ca!”
Cun cualchi sgrisul e un pôc di scaghet o spieti… silenzi, o respiri, po al rive il lusôr e dut al passe. Doman o domandarai aes coleghis.
“Ancje a ti! Jo o ai tasût. Ma doi dîs prime che a tu rivassis e je muarte Dolfine, scuasit 100 agns, e prin di lâ nus à dit “Gracie dal vuestri bon cûr, no us bandonarai mai. Vûstu che a seti za tornade?  Jo doman di sere no ven! Rangjiti tu!”
Di gnûf in turni, ma o pensi a mê none, a ’nd à viodudis cussì tantis, ma e à simpri cjatade une rispueste in te vite o fûr di chê, ma nô, fîs di Google o restin cence rispuestis!
Mi prepari: puartis sieradis a clâf, stanziis ispezionadis, i nonos cuiets, pile in sachete, orelis spiçadis.
Miezegnot. Il citofon al sgrasaie di gnûf. Porc… cramp di panze, o jevi di scat. O tu o jo!
“Pronte, cui isal?”
“Soi ALEXA la tô assistente virtuâl ducj i toi aparâts a funzionin benon,  io… no ûs bandonarai mai!”

di Siruc
#1600