CC24Avrîl#01 – Cuistion di gjenar

#01 – Cuistion di gjenar

Il miedi i veve conseât di mudâ di aiar. Che al sarès miôr cirî une altre citât par jessi a stâ, dulà che si feveli par inglês.
Lu veve cjalât a lunc, par cetant timp che pardabon al veve crodût che al pensàs pardabon al so consei. Biel dineant cul cjâf, lu veve lassât cence dîi nancje une peraule.
Cualchi mês dopo al scugnive lâ vie, par un cors che la sô aziende i veve obleât a fâ par cognossi chei che a lavoravin tal so puest, ma intal forest. E cussì si metè a vuidâ par tresinte chilometris par rivâ ae cunvigne. Cuissà se al varès cjatât cualchidun che al fos stât a vore a Londre, par fâi almancul la domande. Chel timp spindût a vuidâ i veve puartât un pocje di sperance.
Un grant hotel viert fûr de stagjon pe cunvigne al spietave la sô machine, il fantat in monture le veve cjapade par puartâle a parcâ, biel fasint une bocjate che nissun al veve viodût.
Tal salon, devant di un grup di fantatis maraveadis, un om al lassave colâ dispès cualchi peraule par inglês tal so discors, par fâ viodi che al jere a stâ a Mumbai. Nol jere Londre, culì da râr a fevelin par inglês.
Si zontà al grup cuntune bocje di ridi par vê un cjalt benvignût cence jessi tornade. L’om al jere impiât a font de storie, ma si gjoldeve des cjaladis des fantatis. Cussì ogni tant al alçave il cjâf par cucâlis di sot in sù parfin rivant ae muse, se a meretavin.
Di colp, si jere fermât tal mieç de storie, cu la bocje vierte. E jere la sô oportunitât di fâi la domande.
Lis ridadis a crepe panze, lis domandis, e di piès, lis rispuestis i faserin cori cence viodi il troi par tornâ te machine. Si inçopedà cui tacs par finî tal paviment cu la cotule che i platave il cjâf. Al jere tornât il fantat in monture e intant che al judave a rimetisi in pîts, i veve domandât parcè si lassave i mostacjis cussì luncs se i plaseve vistîsi tant che une modele.
I jere rivade di bot la sentence: nol jere di cjatâ un lûc cence il pês di un pronon di gjenar, al sarès miôr un viaç tal timp par sintisi, tal avignî, a gust cul so cuarp e la sô anime.

di Noemi Salva (Mari de Gnot Nostrane)
#1599

2 comments