CC24Març#19 – Komorebi

#19_Komorebi

A Tokyo, chest an, la floridure dai cjariesârs e je rivade in anticip. O sin inte tierce setemane di Març e lis fameis si dan dongje in tai prâts par fâ Hanami, par amirâ chest maraveôs spetacul de nature.
Par Gaia peró a son zornadis une vore brutis. Une setemane indaûr, cuntune videotelefonade, il so morôs di Tisane al a çoncjât un amôr ch’al durave di cuatri agns.
Cumó dut i someave inutil: il so an di studis inte Universitât di Tokyo par aprofondî la lenghe e la culture gjaponêse, la sô passion pe filosofie dal Soreli Jevât, la maestositât de capital… dut, par siet luncs dîs, al veve pierdût di sens denant dal so dolôr.
Ma vuê Gaia e à decidût di sfuarçasi e lâ fûr, e à sintût  la dibisugne di fondâsi inte nature. E à cjapât la metro e e je rivade fin te stazion di Kichijoji. Di li, daspó di une curte cjaminade, e je rivade al parc di Inokashira, une oasi verde cuntun piçul lât tal mieç e une vore di arbui e flôrs di Vierte, di podê doprâ par fâ il plen di bielece. Un respîr profont… e sì, Gaia benzá si sint miôr. La jerbe frescje dal prât e je di un colôr vert vivarôs, puntinât di flôrs cun pics tenars. Ma al è alçant i voi che il spetacul si fâs iresistibil. In chel cjanton dal prât indulá che si è distirade, voi in tal cîl e cuarp sprofondât intal jet umit di fros di jerbe, i sakura, i flôrs dai cjariesârs al pâr che la saludin, cu la forme a cûr dai cinc pics che a disegnin raps di flôrs rose palit, simil a nulis.
E, maravee ancjemò plui grande, i rais sflandorôs di soreli e passin jenfri dai ramaçs, e a dispierdin lis ombris proietatis sul prât.
In gjaponês e je une peraule par descrivi chest fenomen, komorebi, e e â ancje un significât simbolic. Intune situazion che e somee scure bisugne fermâsi e cjatâ chei piçui rais di lûs par ripiâsi prime di lâ indenant.
Cirî la positivitât in tes piçulis robis: ancje chest e veve imparât in Gjapon.
De sachete al è vignut fûr un sfueut pleât in cuatri.
Lu vierç e lu torne a lei:

Parsot un cîl vert
Tu – il vint a torzeon
Sù, un prât cobalt.

Al è un haiku che i à regalât un so compagn di cors, Haruki. Une lagrime e ven jù su la sô muse, ma cheste volte e je di gjonde.

di Alessia Meacci, Patrizia Torossi (Incocalît)
#1585

2 comments