Tu scrivarâs une conte cun dentri…

La miezegnot e je passade.
Il cîl al à spudât  fûr colôrs e tonadis. Sflamiadis verdis e rossis e celestinis e zalis e blancjis e colôr di rose e di viole e di naranç a àn dispicjât la gnot dal so jet di scuretât e le àn mandade a sburts e scufiots fin te puarte dal cricâ dì. Un davoi che al à sveât ogni creature.
Un sbilf al à vierzût un voli, un guriut chel altri e un maçarot ducj i doi. Un scrat ju à tignûts sierâts ma al è sveât, e i salvans no ju àn, ma dut a viodin. Plui innâ, tes crevaduris dal scûr, la Mari de gnot e cuche, il Diaul i ten la code e il Boborosso, zuiarin, a bale sot dai jets.
Ma nol è dome lui a fâ fieste… a balin tai flums lis aganis e lis krivapetis, a cjantin insiemi lis striis e lis fadis, e cor sul mâr glaçât la Blancje Dame. E tai gatui de tiere un orcul al brinde cuntun krampus, e parfin un benandant, al fâs cunvigne cul so vencul. Forsit par che ancjemò zovins, a son sforadis, ma di Timau e di Mortean, ancje il Fischiosauro e l’Alien a metin fûr il nâs. E intant, parsore di une rame sclendare, tal mieç di dut e dal nuie, la gjate marangule e ronrone cidine.
Al è scomençât l’an gnûf, o sin al prin lusôr, un Bon Principi a ducj, cul teme di Zenâr.