CC24Zenâr#26 – Acusis

#26 – Acusis

“Ordin!”, al sbielà il maçarot, batint cun la sô mace tal çoc di len là che al jere sintât. “Ordin!”
Te largjure, la platee si fasè di bot cidine (gjave chel macaco dal braul che al rideve simpri, ma al fo daurman sfolmenât di une voglade de marangule).
La figure di un grandanili, dut braurôs de sô pirucone e de sô toghe a pene sopressade, e vignî indenant e si sintà suntun scagn di len imbutît di sfueis.
“Il judiç al è daûr a mandâ fûr la sentence!”, al proclamà un dai pavars che al faseve di vuardie.
Il grandanili si justâ i ocjâi, e cun vôs solen al disè: “Che l’imputât al vignedi indenant”.
A chel pont, un piçul guriut, cun la barbe e i cjavêi ducj sgardufâts e lis mans inmanetadis, al le indenant dal judiç scortât di un pamarindo.
“In gracie des provis e des testemoneancis presentadis a cheste Cort dai Sbilfs, o pronunzi chest tâl guriut colpevul di dutis lis acusis, ven a stâi: sabotaç dai boscadôrs umans a vore lì dai trois CAI 227-229 pissantjur intai serbatoris des motoseis; possession e traspuart di esplosîfs (cuatri Raudos e un Magnum); scuindiment des clâfs de ruspe dai operaris umans lì dai trois CAI 227-229; incuinament dal mangjâ dal capocantîr uman simpri lì di chei trois CAI pissantji (ce stomi!) te flascje; causament dal slac de mont capitât ai 4 di Lui dal an passât, simpri lì di chei trois che o vin za dite. Vêso alc di zontâ?”
Il guriut nol alçà nancje il cjâf. Al disé dome chest: “la rivoluzion industriâl e lis sôs consecuencis a son stadis une disgracie par la sclibe dai sbilfs”.

di Enrico Tomasi (Secretariât)
#1533

2 comments