CC24Zenâr#25 – La Merecane

#25 – La Merecane

Visepente, 8 di Zenâr ’44.
Son scuasit lis vot sot sere.
Gno pari mi dîs: “Fantat no âtu di lâ te butege di Taresine a cjolmi un cuart di ros che o finìs di cenâ in glorie, al è des cinc di matine che o soi a fâ scuari te pustote di Mandiç. Va mo frut, viôt se Spilucje ti jemple il veri, ma sta atent dai Mucs pe strade, se ti fermin, tire fûr la tessare e se no vâl, sangloce, e disiur che tu ciris to pari in ostarie che nol è inmò tornât a cjase”.
Stradon de Pontebane.
Riferiment a gjestre e a çampe pai aereopuarts di Rivolt e Vilevuarbe. In Paîs ducj i barcons a son sierâts pal oscurament inponût dai todescs – lis lûs a son segnâl pai ricognidôrs aleâts – dome i scarpons de milizie todescje di patulie si ju sint a cricâ su la glerie de strade. Po di bòt il cîl si inpie, come stelât.
Bengala, ju clamin, lusôrs mai viodûts chenti, e jù par Codroip a bruntulin motôrs… ma no di automobilis, ma ben plui grancj. Tun bati di cee, bombis, polvar, vuics, porcons, vaî, ciulâ.
E sanc sui vistîts… tes musis… Sui cuarps distirâts! Po silenzi … … … …
Il dopo al è dopo, mi dîs il pai, sbassant i voi e passantsi la man su la barbe curte ma aromai blancje. “Sorevivi, judâsi,traficâ… alçant simpri il cjâf pal doman”
Cussì o vin fat… Ancje tantis cojarjis… ma chês no pues contâlis. Gno pari, a fuarce di vitis si è smolât, in chê sere, e po mai altri. Ma jo lu sai.
Jê… e jere za picjade, ta chê sere, sul parecjadudis di Geniti – l’informadôr de Resistence locâl – e dopo su lis valîs dai miei cusins di Gnespolêt vie pal Canadà, tra zoventût che e lave e fameis che a tornavin.
Vignude sù di strafori, pas a pas, cul polvar dai scarpons aleâts, tacade sui scussons dai Leopard,de Sicilie fin a Milan.
E veve leams cun ducj, il so non al passave di bocje in bocje.
Curant lis pachis dal “faightà” fûr des ostariis, pal vin o pes feminis o se mai, smorbidint un sangloç, par un afiet lassât lontan di là dai grancj mârs. Ma il so profum al restave, come la polente su la ghise.
Si è fermade ancje a Visepente, une tipe colorade, no une sdrondine, poiade sul bancon des buteghis, il so biel trat al ricuardave sunôrs lontans, di sax e tambûrs che a morestavin la anime e la gramule.
E jere di ducj e di nissun, dispès e sparive par setemanis, ma cuant che e tornave, un evviva al jemplave la buteghe di siôr Dario.
“Ciù Ciù” a comandavin alore i soldâts merecans de Base di Rivolt. E jere colorade ancje jê, sostignude, sapide, e, come un mambo, ti faseve bati i tacs di Vibram sul breâr,ti bussave e ti muardeve lis gjengjives Ma…. Mi cognossistu?
Cingon di Canele, o soi; Pandolo!
Jo plui piçul dal bancon de buteghe di Tasio, Bepi di Ursule mi spedive cun vincj francs a cioli Gauloise cence filtro e i siei cingoms preferîts.
E mi soi inamorât des speciis e a fâi cuintri aes tristeriis de vuere, che a cjapin sot par solit i plui debui, ma nus lassin la memorie, par lotâ ancje vuê e tignî dûr cuintri dutis lis porcariis dai oms e dai timps.

di Stiefin Asquini (Siruc)
#1532

1 comment