CC24Zenâr#24 – Il madrac muc

#24 – Il madrac muc

A vevin volût fotilu par vie che, di cjoc, al veve cojonât il caporâl devant di duçj. Tant al è: esplorazion daûr des liniis dal nemì. Si viodeve biel che muart. Se no tu mueris par man dai talians, ti copin i tiei par diserzion.
Stant che sul Pal Piçul al jere il fisco, al veve decidût di fâ il zîr par daûr dal Avostanis e de bande di Promôs, lâ jù fin disot Tamau.
Al veve parincj di chês bandis, dutcâs la vuere ju veve fats passâ de bande dal tuart!
Gnot cence lune e dut al jere lât slis. Coragjio o incussience, al jere rivât fin dongje di certs stai pene parsore Cleulis. Masse dongje. Un trop di int, saltant fûr di une cjase, lu sburte a platâsi tal bosc, ma pas e cjacaris a parin lâi daûr.
Come un sghirat al veve cirût di platâsi, ma al veve infondât un pît intune poce di pantan. Al veve scugnût lâi dentri fin te panze a di chê palût slichiote.
Vôs di oms. Soldâts, sigûr. Al veve sperât che a fossin chês feminis che a puartavin riforniments.
Stevin lant. Al veve crodût di vêle puartade fûr, cuant che daûr de schene al veve sintût sbrissâi intor, un alc di grues e lunc. Un madracat! Mai sintûts di cussi bocogns in mont. Liparis e magnis va ben, ma madracs di aghe, chê po no ve.
Al veve cirût di no berlâ, ma nol veve podût fâ di mancul di movisi par tirâsi vie de bestie, che e jere scjampade svuacagnant e fasint un casin da madone.
I soldâts a vevin sbarât chel avertiment che al rive subit prime dai colps di moschet. Si viodeve muart.
A colp però, juste di daûr di lui, no partissie une piulade fuartissime. Chê sivilade no pareve jessi une robe umane e nancje un sunôr fat di alc di mecanic. Sta di fat che i soldâts spaurîts a jerin scjampâts vie cence nancje pandi un colp e lui al jere rivât adore a sghindâle.
Nol veve mai rivât a spiegâsi ce o cui che al jere stât a produsi che sivil.
Tant al è che agns dopo, intal paîs, a ziravin vôs che un nemâl misteriôs al viveve in che palût. Lu clamavin Fischiosauro.
Nissun lu a mai cjatât, ma dal sigûr a so timp al veve scombatût cui mucs.

di No Ancjemò
#1531

2 comments