CC24Zenâr#20 – Cjape la çate cence cencenament

#20 – Cjape la çate cence cencenament

Il Flum, cul so cuarp intorteât che al si slungje viers la val, insuazât dal fueam dai arbui che si inchinin al so passaç, al è stât, par me e par lis altris mês compagnis par tant timp une font di vite e di ispirazion cence fin. Fin cumò.
O vês di savê che nô no sin lis solis a gjoldi de sôs aghis cristalinis e puris, ma ancje i abitants dal paisut ca dongje a vegnin chi a rinfrescjâsi vie pe stagjon cjalde, a pescjâ intes sôs gjenerosis aghis e a racuei lis jerbis medisinâls che nô o coltivìn cun tant amôr ancje par lôr.
Des voltis a si fermavin su lis rivis ancje dome par fevelâ tra di lor o scoltâ i nestris cjants, intant che i fruts a zuiavin contents. Nô o vin simpri cjalât la nature e i oms, come chel dì cuant che un dai lôr fîs, un frutin inespert ma cence pôre de aghe, si veve fat tirâ sot dal Flum, e jo lu ai a colp grampât e poiât cun cure suntun cret. La felicitât e la ricognossince dai gjenitôrs e i voi dal frut, di agrât e plens di maravee, mi veve fat pensâ che il nestri leam cui abitants dal paisut no si sarès mai rot. Ma alc al à fat di bot distudâ l’amôr che l’om al veve par il Flum e colâ la fidance in nô. Une vore di timp dopo la aventure dal frut, cualchidun, vignût di lontan, ju a convinçuts che al sarès stât un bon afâr par duçi lôr lassâ fâ sù une grande fabriche dongje dal Flum. Ma no tignivin cont dal pericul di incuinâ lis sôs aghis, intosseâ l’aiar che a respiravin e ruvinâ il paisaç di flabe.
E nô, che o sin lis fadis dai cors di aghe, o vin cirût, cence risultât, di convinciju a no fâsi inmagâ di promessis svoladis, che il tesaur plui grant al jere bielzà jenfri di lôr: la nature incontaminade, la aghe sclete e plene di pes, l’ajar net e une calme rote nome che dal cori dal Flum.
Cumò o soi chi cu lis mês compagnis e o sin daûr di lâ vie cirint un altri puest dulá vivi, lassant ai abitants dal paîs l’avignî che a àn sielzût…

Clara, daspò jessi tornade indaûr cul pinsîr a la vite pene vivude, e volte i voi za plens di nostalgjie viers il bosc dongje des rivis dal Flum prin di cjapâ lis compagnis su la çate fate di troncs peâts tra di lôr, che, puartade da la corint, lis varès puartadis intun lûc plui cuiet.
Ma ve là, su lis rivis dal flum, un fantat: al è il frut che Clare e veve salvât agns indaûr … Lui al viôt lis aganis intant che a van vie su la aghe e al nase subit che a son daûr a lassâ il bosc.
Cence cencenament al salte intal flum e al cjape la çate. Nol vûl che il so futûr al sedi chel dai abitants dal paîs.
Impressionade de braùre del fantat, Clare lu jude a montâ sù su la çate e i si lasse cjalâ intai voi, une robe che lis aganis par solit cui umans no fasin. Lis lôr mans no si lassin nancje cuant il fantat al è al sigûr. I lôr voi a stralusin di gnûf plens di sperance. Lis aganis lu puartaran vie cun lôr contentis che no ducj i umans a sedin bramôs.

di Alessia Meacci, Patrizia Torossi (Incocalît)
#1527

1 comment