CC24Zenâr#08 – La flabe Rockdown

#08 – La flabe Rockdown

Tant timp indaûr, al jere un mont une vore stramp.
No si podeve tocjâsi ni bussâsi ni là fûr di cjase.
In dut il mont, eh!
E pûr e jere une fade – fade Catine – che e veve vût un pâr di alis in regâl di un frutin, cuntune incarghe impuartante: dreçâ chel mont stramp.
Cun chês alis, par magjie, e jere deventade pavee.
Jê e svolave, plui svelte che podeve.
No faseve câs al frêt ni al aiar ni aes fueis che i fasevin cjarte di veri sul mustic.
E saveve di vê dome une zornade di vite.
Toc toc… e sintì sore la alute a drete. Ma ce sucedie?
Brrrr, ce frêt!
Cuasi e colave sot i flocs di glace, chê che i oms e clamin nêf.
Cun fadie, si tirà dongje di une biele cjase, cun tantis lusutis che si piavin e si distudavin.
E viodè une frutine, forsit di sîs agns, in braç di sô mari.
I domandà: «Mame, ce isal il Rockdown?»
Cun pazience, la mame i disè che no si diseve Rock, ma Lockdown.
«Vûl disi che varìn di stâ sierâts in cjase, come chê altre volte. Ti ricuardistu, vere?»
«Eh, sì, no si lave nancje intal asîl pe infanzie. Inalore, mame, nancje tu tu larâs a vore?»
«No, starai a cjase cun te. Però varai di sierâ buteghe».
«Mame, se tu no tu lavoris, alore nuie becins? Nuie becins, nuie mangjâ. Ma jo o ai fan, la sere!»
«Ninine mê, sta cuiete, varìn di mangjâ, di sigûr. Forsit, un pôc di mancul, ma starin insiemi. Tu viodarâs, al finìs il Lockdown».
«Sigure, mame?»
«Une mari no conte bausiis» e rispuindè mame Lise.
Sintint chestis peraulis e viodint chê frutine indurmidide, pavee Catine no sintive plui il frêt.
Ancje se la nêf, aromai, e jere alte, jê e veve un biel cjalt intal cûr.
E veve capît di jessi fuarte e di vê coraç e che il mont, a planc a planc, si sarés dreçât. Par merit dal amôr!

di Pierina Gallina (Stele Alpine)
#1515

2 comments