Pizimprestzighet

«No, no si può!»
«Ma jo us e pai, eh. Mighe di rive jù!»
«Capisco il desiderio, ma no. La legge lo vieta… e poi. Suvvia!»
«Ma su vie ce, ce coventino se ju lassi ca. Che a ledin rusins parsore o sot tiere ce che al cambie?»
«Cambia che non è ammesso. Le aree cimiteriali sono dedicate alla sepoltura degli essere umani. Esistono i cimiteri per gli animali da affezione, questo sì, ma un’area per la sepoltura… di cose, no. Non c’è».
«E insome, ai di rassegnâmi?»
«Eh… temo di sì. Inoltre… sa, si tratta di…»
«Di?»
«Di… si, insomma…»
«Fuarfiis? Tramais? Palissis? Foradoriis? Ferâi? Gurletis? Tamons? Corlis? Jôfs? Brustulins? Menevîts? Tenais? Medais? Robe di vuere? Ce che al è che no us va ben?»
Il cerviel dal funzionari dal Comun al veve corût su lis peraulis come se al cjaminàs sul glaç… rifiuti… cianfrusaglie… oggetti inquinanti… e ae fin al jere rivât a un teren plui solit.
«Oggetti di valore», al veve trabascjât.
«Ah, chel po sigure! Ma dome par me, ce crodêso. Par chel o vuei puartâmai daûr!»
«Ma non si può, come le ho spiegato».
Bepi al jere jessût dal Ufici cence sbati la puarte, ma al jere come se.
Ce che i cambiave a lôr se al comprave doi locui invezit di un. I bêçs ju veve, ce crodevino. La leç… la leç al è il fusîl dai parons. Simpri stade. Ah, ma jo… ma jo… al mastiave incrugnît, cjaminant pal curtîl, cul Rocky che i saltuçave fra i sghirets e il soreli che al inluminave i mûrs sfodrâts di imprescj di ogni sorte. «Ma jo… o voi dal pizighet!»

Si cognossevin di canais, e mieze ore dopo al jere bielzà cul tai in man, te so taverne.
«Cjale… jo no pues risolviti il probleme…»
«Eh, ancjemò un fete di chel salam che tu mi tais no tu mal risolvis no, cul colesterolo che o ai!»
«Mangje che tu sês patît, Bepi! Disevi… no pues propite fâ ce che tu disis»
«Sêstu sigûr?»
«Ma cjale… jo podarès ancje dîti di sì. Che ti scolti. Che ti fâs fâ dal fiol une buse plui fonde, magari cuasi il dopli. E pues ancje dîti che vignarài a cjoliju cjase tô e che ju butarai dentri. E magari ti dîs che o metìn un vêl di tiere, e daspò il plevan al viôt dome chel e noaltris o poìn la casse parsore. Podarès dît cussì. Ma no tal disarai. O soi un pizighet… e no puês dîti cussì».
«No tu mal disis».
«Eh… No tal dîs».
«Ma tra il dire e il fare…»
«C’è di mezzo il funerale».
«Alore o sin dacuardi. O segni chei che a son di segnâ. Ma…»
«Ma?»
«Ma se tu saludis prime tu? Ancje i pizighets a saludin, eh».
«O lassarai dite al fiol… che nol à di fâ cheste robe ca, che ti ai dit che no te fâs. Clare».
E cence nancje stenzisi la man, da rest i à dit che nol faseve la vore, Bepi al salude e al torne cjase cul cûr in pâs e un bussulot di vernîs, par segnâ ducj i imprescj che al à voie di puartâsi daûr, te tiere dal cimitieri, cuant che i capitarà di lâ a stâ li.

di Rafaêl Serafin
#1500

4 comments