La conte misteriose (19): Continuitât dai parcs

Al veve scomençât a lei il romanç un pôc di dîs prin. Lu veve bandonât pai dafârs pressants, al tornà a vierzilu intant che al tornave in tren viers la fatorie: plan planchin si lassave cjapâ de storie, dal dissen dai personaçs. Chê sere, daspò di ve scrit une letare al so procuradôr e di ve tratât di une cuistion di metadie cul fatôr, al tornà al libri te trancuilitât dal studi che al dave sul zardin di rôi. Distirât te poltrone favoride, di schene ae puarte che lu varès disturbât tant che une iritante pussibilitât di intromission, al lassà che la man çampe e lenzès plui voltis il vilût vert e si metè a lei i ultins cjapitui. La sô memorie e tignive cont cence fadie dal non e lis imagjinis dai protagoniscj; la ilusion di romanç lu inmagà cuasit subit. Al gjoldeve il plasè cuasit pervers di slontanâsi rie dopo rie di ce che i jere tor ator e di sintî tal stes timp che il cjâf al sostave comut sul vilût dal alt schenâl, che i spagnolets a jerin simpri sot man, che plui in là dai grancj barcons al balave l’aiar dal crepuscul sot i rôi. Di peraule in peraule, cjapât dentri il cragnôs dileme dai eroi, molantsi sù viers lis imagjinis che si cumbinavin e a cjapavin colôr e moviment, al fo testemoni dal ultin incuintri tal cason dal bosc. Par prin, e jentrave la femine, malfidente; cumò al rivave l’amant, la muse feride cun lis scoreadis di un ramaç. 
Mirabilmentri jê e stagnave il sanc cun lis sôs bussadis, ma lui al refudave lis cjarecis, nol jere vignût par ripeti lis cerimoniis di une passion segrete, riparade di un mont di fueis secjis e di trois riscosis. Il stîl si clipive cuintri il so pet, e sot e bateve palesade la libertât. Un dialic malcuiet al coreve pes pagjinis tant che un riu di madracs, e si capive che dut al jere bielzà decîs di simpri. Fintremai chês cjarecis che involuçavin il cuarp dal amant cuasit che a volessin blocâlu e divoltâlu, a segnavin in mut odeôs la sacume di un altri cuarp che si scugnive di disfâ. Nuie al jere stât dismenteât: alibis, circostancis, erôrs pussibii. Fin di chê ore, ogni moment al veve fissât in mût meticolôs il so lavôr. Il dopli dispietât struc a pene si fermave par lassâ che une man e cjarinàs une gote. E scomençave a calâ jù la gnot.

Cence nancje plui cjalâsi, leâts a strent al cefâ che ur spietave, si lassarin te puarte dal cason. Jê e doveve lâ dilunc il troi che al puartave viers nord. Dal troi contrari lui si voltàs un moment par viodile cori cui cjavei molâts. Al corè ancje lui, parantsi dai arbui e des cisis fin che al distinguè te brumacje malve dal tramont il stradon che al puartave te cjase. I cjans no dovevin vuacâ e no vuacarin. Il fatôr nol doveve di jessi a chê ore, e nol jere. Al le sù i trê scjalins dal puarti e al jentrà. Dal sanc che i galopave tes orelis i rivavin lis peraulis de femine: par prin une sale turchine, daspò une galarie, une scjale cuntun tapêt. Tal plan disore, dôs puartis. Nissun te prime cjamare, nissun te seconde. La puarte dal tinel, e inalore il stîl in man, la lûs dai lastrons, l‘alt schenâl di une poltrone di vilût vert, il cjâf dal om te poltrone che al stave leint un romanç.

Conte misteriose di induvinât tai coments
Voltade di Noemi Salva

2 comments