Wormhole

O soi a stâ intun paisut… disìn biacemai… un pôc curiôs.
Si distire da pît des culinis de Tiere di mieç, poc disot dai persuts e in bande des cicognis. A dîle dute, no soi nome a stâ, propit o vîf intal paisut, parcè che ancje o lavori, di cjase. Ma, cundut che a son passâts bielzà plui di dîs agns che o soi achì, o resti simpri un forest. Di prionte, no soi nancje cuissà ce bon di fâmi amîs gnûfs, o ai miôr stâ par gno cont, intal mieç dai miei libris – che dispès a son i amîs plui sincîrs. Però a son simpri cun me – intai biei e intai bruts moments – Snait e Sbilf, i miei cjans, che cun lôr i moments a son cuasi simpri biei. E insiemi, ogni dì, o lin a cori pai cjamps e pai boscs, lôr a usmâ il salvadi, jo a gjoldi dal aiar, dal soreli e fintremai de ploie.
Us disevi che il gno paîs al è curiôs parcè che al si displee par plui o mancul cinc chilometris par lunc e scuasi cuatri par larc, dut in rie drete. Un al pense che cinc chilometris no son cuissà cetant, però… Chê altre dì, biel che o lavi fûr cui cjans, mi soi visât che l’orloi dal tor, bande soreli a mont, al faseve lis siet e un cuart. Daspò di vê torzeonât un pôc, o soi rivât di chê altre bande, e l’orloi a soreli jevât al segnave cuasi lis vot. Orpo, ma no sin stâts ator cussì a dilunc… va e no va, o ‘nd ai metûts tredis, cutuardis minûts par fâ il zîr… E alore? Che al sedi di cualchi bande, intal mieç dal percors, un wormhole, un puint di Einstein-Rosen jenfri dal spazi-timp? Une plee gravitazionâl?
No ai durmît dute le gnot, cun chest carûl. Si che duncje la dì dopo o soi lât fûr ae stesse ore cui cjans e cul dron – savêso, chel elicotarut che si pues fâ lis fotos di adalt – e lu ai fat svolâ ator dai cuatri orlois dal tor de glesie. A soreli a mont, siet e disevot; a soreli jevât, siet e trenteun. E alore o ai capît. No je cuistion de ore di don Camillo e di chê di Peppone – chei orlois achì a saressin ducj dal plevan! E nancje robis di discomodâ i triestins dal sincrotrone. No, si trate invezit dal fûs orari! Le vile e je cussì lungje, cussì distirade di une bande a chê altre, che e tapone un toc di meridian che al baste par chê diference di orari! Di drete a çampe tredis minûts! O jeri tant content di cheste mê discuvierte – o vevi ben di pandi cheste gnove! – che, pe seconde volte te vite (sì, o soi ancje astemi, ma mi someave propit il moment just par screâ cuntun tai di neri), o soi lât inte ostarie de place dal paîs. E, biel che o spietavi che al jentràs cualchidun par contâi dut (o jeri za cu le tace in man, ma le ustîre no mi deve seont), o scoltavi svagât chei doi cjochelis te taule in bande: «Po, âstu sintût le ultime dal muini? No rivin a cjatâ nissun che i comedi l’orloi de glesie… Al è plui di un mês che al è fer, e ancjemò nuie ce fâ».
O varài di lâ plui dispès in place a bevi un tai. Frute, par cumò metimi ju ancjemò une tace.

di Stiefin Stefanut
#1***