Letaris e software

Rico al jere perplès, no si sintive sodisfat devant di chel diluvi di whatsapps, facebook e twitter, che al cjatave simpri cuant che al impiave il celulâr o ben l’ordenadôr. Ducj chei messaçs no rivavin a colmâ chê ansie che al veve di comunicâ cui altris. Al è vêr che lis cussì clamadis rêts sociâls a vevin contribuît a morestâ i efiets negatîfs di ducj chei mês di reclusion dilunc de pandemie. Ma purpûr al sintive che i mancjave alc.

Rico nol jere un natîf digjitâl, al contrari, za in pension, al jere su lis setante primeveris e viodint chei messaçs al sintive une dolce nostalgjie pes letaris scritis a man. Al ricuardave che, jessint zovin, cuant che al rivave a cjase e al viodeve sore il so scritori lis letaris puartadis dal puestin e che sô mari e lassave li in biele mostre, si sentave e daspò di vê let il mitent, cuntun stilet lis vierzeve, a voltis cun premure, altris cun preocupazion e altris cuntune cure cuasi esagjerade, come vint pôre di fâi dam al contignût che tant al ansiave di lei.

Rico al veve viazât une vore, al jere la persone di fiducie di une imprese che e veve interès comerciâi in dut il mont. Al veve lassât in chei puescj olmis di storiis afetivis, un grum di amiciziis e tantis cognossincis, cundiplui al jere une vore stimât.

In chei agns de sô ativitât, lis comunicazions tecnologjichis no vevin inmò cjapât pît e Rico, cuant che al tornave a cjase daspò di une lungje assence, al cjatave un grumon di pueste. Lis bustis a vevin biei boi di letare di colôrs e formis diferentis e Rico, dilunc chei agns, al jere rivât a fâsi un impuartant album filatelic. Ma l’incjant di colezionâ al finì cuant che a rivarin altris mieçs di comunicazion.

Za nol riceveve plui letaris e nancje lis scriveve. Ma, in font al sintive la necessitât di fâlu. Decidût al jessì di cjase, al fadià par cjatâ une librarie che e ves cjarte e buste, daspò di vêlis cjatadis, ansiôs come un frut cuntun zugatul gnûf al tornà a cjase…

Si sentà tal scritori e cun bocje di ridi al scomençà a scrivi.

di Galliano di Buenos Aires
#1***

2 comments