Lupo Manarie e la Setemane Enigmistiche

Alore, al sucêt che Lupo Manarie al à comprât la Setemane Enigmistiche e al è daûr cuasi di une setemane a cirî di finî lis primis peraulis in crôs che al à cjatât. Une setemane! Cence ne mangjâ ne durmî – parcè che Lupo Manarie, lu cognosês, al è fat cussì – che i je vignude une muse di flebo lungje e dure come un tomât di carnevâl. Ma nuie pôre, se il gjornalut si clame Setemane (enigmistiche), al volarà dî che ogni passetimp al à di durâ… une setemane. Ma cumò la setemane e sta par finî e a lui i mancjin ancjemò un biel pocjis di definizions… Ce fâ, ce no fâ, al decît di fâsi judâ. E cui puedial jessi brâf intes peraulis in crôs?
Ma la sô amie Bibliocheche, no!

Si che le clame e i lei lis domandis, une par volte, e jê svelte e rispuint.
«1 verticâl, vot letaris… Si usa per grigliare dinosauri…»
«Pi-gna-rûl!»
«6 orizontâl… 4 peraulis… definizion dople. Erbe delle valli del Natisone… o ancje Mago, delle valli del Natisone, a seconde dal acent».
«Mac di San Zuan»
«12 oblicui… 6 letaris e al scomence par K… agàin che ti ven il mês di Dicembar».
«Kram-pus!»
«Juste! Oh, alore sint chê ca, 8,45 laterâl… cinc letaris scritis cun gjonde… Si sa cuant che si va, ma no si sa cemût che si torne…».
«Sa-gre».
«E cheste ca? Cheste e je dificilissime! Lidrîs di 5, par ledrôs… 8 letaris ben distacadis: fantatis une vore magris e cun pocjis… pôcje robe devant».
«Scjar-ne-tis!»
«Juste!» al fâs Lupo Manarie scaturît, «Ma tu lis sâs propite dutis! Mi mancje une sole… viodìn se tu sâs ancje cheste… Sant che al è miôr no sbaliâ l’acent».
«Facilissime! Al è… Sant Rama-cûl»
«Ma ce robis! Juste ancje cheste. Finidis! Ma âstu lete la biblioteche interie par savê dutis lis rispuestis?»
«Ma ce!» e rispuint la Bibliocheche «Mi è bastât lei un libri sôl! Induvine cuâl?»
E cun chê notizie, Lupo Manarie al decît che Lis Contis dal Mês al à di vêlu ancje lui! Une robe sole nol capìs. Ma cemût aie fat la Bibliocheche a leilu za dut cussì a la svelte, se si pues lei dome une conte al mês?

 di Rafaêl Serafin
Dissens dai Piçui Aiutants di Contecurte Ricart e Jacum
Peraulis in crôs de gjatemarangule