Eh sì, aromai o vin tacât a fâ come chei vêrs e a clamâ il nestri libri par sigle, che al pâr un numar roman, LCDM, ma che al sta dome par Lis Contis dal Mês, il libri di narative e sagjistiche screât sabide stade là di Pituel.
E stant che o vin cualchi gnove e che il libri al à tacât a zirâ ator, o vin pensât di meti cuatri peraulis dutis insiemi e pandilis sul sît. Ancje parcè che a plui di cualchidun us vin scrit ma cualchi mail e à vût fastidis, in chescj dîs, e no vês ricevût lis comunicazions.
Alore… la prime gnove e je che il libri, come di acuardis, al è disponibil li dal tabachin in place a Sclaunic, (Eredi Gomba Pagot) e a mancul che no ledis di lunis o domenie daspò misdì lu cjatais simpri viert. Sì che, se o sês te liste o cjatais ancje il premi esclusîf, che aromai o podìn disvelâ che al è un super calendari dal 2023 fat cu la cuvierte dal libri. E se no ses inte liste… o cjatais il libri e ancje scontât. Ce voleso di plui.
La seconde gnove e je stade chê di scuvierzi che cualchidun di fûr Friûl al à subit profitât di cjoli il libri in rêt e o vin vût avistaments dal libri sedi a Rome e sedi intal Rhode Island, (passât Basilian e pôc prin di rivâ a New York). E insome… e je simpri une sodisfazion!
E intant che o spietin che cualchi copie e rivi sane e salve ai nestris amîs a Buenos Aires o vin vût il plasê – stant che il calendari no si podeve spedîlu, che al è graaaaaaant – di zirâlu al nestri comentadôr plui ferbint e presint (che al lei e comente in pratiche dutis lis contis de ostarie). O stin fevelant nuiemancul che di Potonzio, aka Luciano Marinig, aka Lussian di Varian… Propit vuê l’Ostîr al à fat un scjampon e i à puartât libri-calendari-diplomediCorsecurte, come che o podês viodi certificât de imagjin parsore, Ma mighe finide li…. L’Ostîr al à subit proviodût a obleâ… ehm… conseâ Lussian a picjâ il calendari tal puest di chel che al veve e… cjalait ca sot ce biel! (un graciis a Noemi e Eduart che lu àn volintîr cedût).
E ultime robe, che us spiin subite, ancje se par i detais o vês di spietâ un moment… ma o vin in programe la prime presentazion uficiâl dal libri, dopo la scree in amicizie di sabide stade. Dulà? A MONTENARS, AI 12 DI FEVRÂR, AES 18.30… e par cumò che us basti.
