La Scree des Contis dal Mês

Scomencin di chi, di cheste foto che nus à fat prin di saludâsi il Muini de Ostarie, simpri pront a curiosâ dut e meti lis mans come par preâ, ma cu la machine fotografiche in man. E le à cumbinade… sin rivâts a fâ une fotografie ducj insieme, noaltris autôrs dal libri Lis Contis dal Mês e ancje partecipants al spetacul che lu à screât.

E come che o sês usâts, ve chi che us lassin une biele croniche de serade, sedi par chei che a no jerin, ma ancje par chei che a jerin, e a jerin in tancj, li di Pituel, a Talmassons, a savoltâ lis regulis des presentazion dai libris.

Eh, sì, parcè che chest ca al è il libri dal an, lu vin dit e no je robe discutibile. E jessint che al è il libri dal an (cuntune storie par ogni mês, ce crodeviso) o vin pensât che no si podeve fâ come simpri, ven a stâi un che al presente e al fâs domandis ai autôrs. No, noaltris o vin fat il contrari. O vin cjolt un dal public che al veve let il libri – tipo Astrid, la Sartore de Osterie – e i autôrs dal libri, Serena e Rafaêl, a àn tacât a fâi lis domandis! 

Clare, e jere une scuse parcè che i doi autôrs, Raffaele Serafini des contis, Serena Fogolini dai articui di aprofondiment, a no si visavin mighe tant di ce che a vevi scrit aromai doi agns indaûr. Ancje parcè che chel an là, il 2020, al è un an che si à voie di sintî nomenâ mancul pussibil e forsit cheste publicazion e je propite alc che e met la peraule fin.

Ma viodin di contâle, un pôc, cheste serade. La Sartore, stiçade des domandis di Coghe e Ostîr, e a spiegât di dulà che al è nassût il libri e che a son dentri 12 contis, che si puedin lei come che si vûl.ì, e ancje 12 articui che a contin une vore di robis. Anzit, par mostrâ tropis robis che si cjatin tai articui e je stade clamade dal public Margarite, la Massarie, che e à contât dutis lis robis che e veve imparât dal aprofondiment di Zenâr, sul Pignarûl, fevelant dai Celts, dal diu Belen (no, no chê Belen là!) e de divignince di chest rît presint in plui bandis de Europe.

Ma no je finide, parcè che si voleve ancje une cerce de narative, ma invezit di lâ a cirî alc dentri dal libri di cjarte Astrid e à pensât ben di lei a ducj i presint une conte fantasime, ven a stâi di chês contis che si puedin lei intune sezion digjitât esclusive par cui che al compre il libri. Un dal public che al à dite di clamâsi Pieri Moràs, ma che al someave une vore a Checo Tam, il Famei, al à let la conte “L’ors“, ambientade intal mês di Jugn (e clare, e fevelave dal mac di Sant Zuan)

Vonde cussì? Ma ce! Par capî miôr che te sezion digjitâl si cjate di ogni (musiche, dissens in plui, il manuâl per fâ il mac di Sant Zuan, un test par scuvierzi se si è furlans e trop o par savê se si è Benandant o Strie…) la presentsartore e à clamât sù un altri dal public cuntune biele muse di purcitâr, e al è saltât fûr che al jere pardabon un purcitâr. Al à dit di clamâsi Mike Berlon, ma al someave dut a Michêl Londar, il Berlon de Osterie. E chel al à contât une storie al public che e pareve propite cjolte di une detule dal purcit.

E dopo cualchi altre domande, ancje dal public, atent e zuiarin, al è vignût fûr il moment plui inspietât e di gale de serade. Il personaç plui misteriôs e fûr cu la cassele de Ostarie, Lupo Manarie, al veve mandade une conte indedite ai doi Piçui Aiutants, Ricart e Jacum, e lôr a vevin fat il dissen su la conte, cun tant di Bibliocheche. La gjatemarangule, par spiegâ miôr la conte, e veve preparât lis peraulis in crôs di finî, e viodêt voaltris… tes peraulis in crôs no jerino ducj, ma propite ducj i argoments che si cjatin dentri dal libri? Ve chi une fotografie par viodi la robe e ve chi la conte di Lupo Manarie!

E no je mighe finide ca. Dome che no podin visâsi dut. Dal sigûr di contâ ancje che in bande dai libris o vin fat viodi i dissens origjinâi dal Ostîr e il premi speciâl che a àn vût i prins 50 iscrits ae Liste di Contecurte che a àn cjolt il libri: un super calendari dal 2023 biel come la cuvierte dal libri e cun dentri il zûc dal “Trova le differenze”, tant par restâ in teme cun Lupo Manarie.

E dopo la scree dal libri e jere ancje in programe la cene di CorseCurte, cun tant di premiazion di ducj i partecipants… ma cheste e je dute une altre storie e us lassin dome une foto par dâus une cerce.

E bon… vonde dai.

Us visin dome, par ducj chei che lu àn prenotât, o par chei che a volin comprâlu, che il libri al è disponibil li dal tabachin di Sclaunic, in place o pûr scrivêt e viodin cemût fâ. Dal rest al è il libri dal an… cemût podêso restâ cence?

2 comments