#19 – L’inventari

E jere une domenie frede di Fevrâr. Lenart al voleve lâ a schiâ cu la sô amie Eline, ma a jê il frêt no i plaseve, e la nêf po… “La nêf e je dome un intric, cuant che e ven no si pues lâ ator, i plâs tant ai fruts ma par mê e je une barbe…”
“La nêf e stramude dut intun mont di flabe, cemût fasie a no plasêti?”
“Ma dai, tancj flocuts che a vegnin jù dal cîl par oris, simpri compagns…”
“Jo no crôt che a sedin doi flocs di nêf compagns in dute la mont!”
“Po sigûr, e cemût fâstu a savêlu? Ju âstu cjalâts ducj?”
Cussì al jere scomençât dut.
Lenart al lave pes monts a cjapâ sù i campions che al meteve vie intune borse frigo, in tantis scjatulutis. Di sere, tal fresc dal camarin, disvuedât par fâi puest al microscopi eletronic, al cjalave un floc di nêf a la volte, e ju fotografave.
Tal visôr un spetacul straordenari: stelis, rosetis, tubui, esagons, pontis a trê, cinc, siet spicis si involuçavin in ricams maraveôs. E lui al regjistrave dut.
Ogni mês i mandave a Eline lis fotos, e no ‘nd ere mai dôs compagnis. Jê lu cjapave par matucel, e e butave lis bustis sù pal fûc cence nancje vierzilis.
Ma lui al lave indevant, ancje dopo che jê si jere imprometude cuntun altri.
Jevâ prin dal cricâ dì par cjapâ sù campions, robâ oris al sium par cjalâ tal microscopi: la nêf e mangjave dut il so timp, e planc planc e impulvinave ancje i siei cjavei. Ma une imprese mai tentade no si pues lassâ a mieç vie.
Une dì i vicins si visarin che la sô machine no si viodeve di une setemane: nol jere mai lât vie par cussì tancj dîs. Lu cjatarin colât jù intun straplomp, dulà che al ere restât inglaçât. Nissune maravee, ducj si spietavin une fin cussì.
Ma al esisteve un testament. I parincj si cjalavin l’un l’altri par capî cui che e jere chê femine anziane che si ere presentade dal nodâr insiemi cun lôr.
Eline si visave pôc di Lenart, ma e sperave di puartâ a cjase alc par tarondâ la pension.
“A Elena Adami lascio l’inventario nivologico completo dei monti del Friuli, da me raccolto durante le ricerche di una vita. Ho catalogato 1.591.296 fiocchi di neve, e posso affermare con certezza che non ce ne sono due uguali.”
Mah… nêf! No je altri che un intric, e pensà jê.

di Stralunade
#1***