CorseCurteDicembar#11 – La stele di Nadâl

#11 – La stele di Nadâl

In tal avion a son tancj plui passizîrs dal solit. Si è dongje des fiestis di Nadâl e a son ancjemò tancj che, di ator pal mont, a tornin in Friûl a viodi la tiere di dulà che a jerin partîts i vons. La zornade e je frescje, limpie dopo une neveade che, inte gnot, e je rivade fintremai aes splazis. Al cricâ dal dî si cjate un fîl di glaç parsore de aghe intes lagunis di Grau e Maran. Dal alt dal avion si viôt dute une cuvierte di blanc che, de mont, ae rive jù fin te plane. Il comandant dal avion al domande a la hostess se i passizîrs a si son inacuarts dal panorame che si gjolt di adalt.
“Sì, a son ducj che a cjalin par i barconuts. Soredut i fruts.” i fâs jê.
“E ben o ai gust. No mi jere mai capitât un panorame dal gjenar e cuntun tant biel timp. Cumò che o vin di aterâ si sbassarìn ancjemò un pôc.”
Il comandant al domande ae tor di control dal aeropuart Pieri Savorgnan di Braçà di podê aterâ. Il control dal svol i dîs che al à di spietâ ancjemò e che al à di fâ un altri zîr prime che a si liberedi la piste. Alore il comandant al domande se al po fâ une rote che i larès plui comude par rivâ. Da la tor no i fasin problemis. Impuestade la gnove rote, il comandant al cjale fûr sperant di cjatâ chel che al si spiete. E ben sì, al è propit come che al sperave, forsit ancje miôr di chel che al pensave. Al clame la hostess e ancje chê e je maraveade de sorprese. Alore il comandant al cjape il microfon e al fâs ai passizîrs: “Al è il comandant che us fevele: se o cjalais fûr o viodarês che o stin svolant parsore di une Stele di Nadâl!”
Ducj i passizîrs a cjalin fûr pai barconuts e a no capissin ce che al vueli disi ma, subit dopo, a la viodin. Une grande stele, dute blancje, intal mieç de plane.
Cheste al si pant intun panorame che al mostre dome doi colôrs: il blanc de nêf, il celest dal cîl e dal mâr. Cuant che il comandant al sint che i passizîrs a àn viodût la stele al zonte: “Benvignûts in Friûl e buinis fiestis a ducj voaltris!”

di ***
#1***