CorseCurteDicembar#02 – Frêt di vite

#02 – Frêt di vite

Di Cali e jere stade lungje. Une valîs di cartôn, un frut par man e un inte panze, Pedro e Pilar e jerin rivâts a Heidelberg intal crût dal Invier 1960.
Sù e jù par chel coridôr, indenant e indaûr. Pilar le niçulave, le figotave, cjantant biel planchin. Di là de ultime puarte a rivavin sclopetons di tos. A ogni baulade, la piel de femine si ingrisignive, ma no si fermave, un pas daûr di chel altri, un coridôr indenant e un indaûr. Cuant che la picinine si indurmidì, simpri tignintle intal braç e sbassà la mantie de ultime puarte. Ramon al durmive ancje lui, la musute sbatude a fuarce di tossi. Rivade inte cjamarute e poià Raquel inte scune. La frutine no batè cei. “Sêstu pardabon tant brave?” Une pôre lizere a chel pinsîr si slargjà intal pet. Sbassade a sintî se e soflave flât pe bocje, Pilar si inacuarzè che e bulive, i lavris ros come la freule e doi miluçuts di fûc. Flât an passave, ma pôc, masse pôc. Pilar e sberlà corint viers il pat des scjalis. “Ayùda! Ayúdame!” cu la vôs disperade. Al someave che nol fos nissun in dut il stabil, ma invezit une puarte si vierzè e un femenon biont cu la piel di lat le cjalà. “Ayùdame, la niña arde con fiebre!” Une manone si poià sul cernelut e cence dî une peraule je gjavà dal braç.Pilar restà cussì instupidide che no rivà a protestà, ma i lâ daûr fintremai intal curtîl.
Vie pal dì al veve neveât. Lis stradis cuviertis non si cognossevin nancje plui, tante che e jere. La femenone e fasè une buse intun grum di nêf e distirà la picinine e daspò la cuvierzè. La vôs di Pilar si jevà come une lungjissime preiere. “Nooooooooo!”  Al passà dome un o doi minûts e Raquel e tornà intal braç di sô mari. No scotave plui. Dentri, inte sô cjase, la femenone la inglucjà intune cuvierte di lane e le freolà biel planchin. La bocjute e tornà colôr di rose, la piel sclarì e il respîr normalizà.

Raquel i soi jo. La nêf mi à salvade la piel. Lu conti a ducj e nissun mi crôt. No crodin nancje che di chê volte no ai plui vude la fiere.

di ***
#1***