Corsecurte – La classifiche di Novembar

Si sin un tic pierdûts vie, in chest fin di setemane, e ancje se la zurie e je stade puntuâl, o vin slungjât di un pâr di dîs la scjadince de classifiche. Pôc mâl, ve chi che o sin cu la CLASSIFICHE DE CORSECURTE dal mês di Novembar!

Tachìn subit cun disi che o vin vût ancje chest mês vincj concorints ma che si viôt che la strache e je rivade dongje e che ancje cualchi scuadre fuarte e à pierdût colps.

Ma pocjis cjacaris: us metìn chi sot la classifiche di Novembar, a teme Cricâ dì, che e viôt tant che vincidôr… L’Atletic Gjatui!

Atletic che no dome al è vincidôr di zornade, ma al met in rie i doi che aromai o vin capît che si barufaran la vitorie de competizion… il Cjicechepicjedispicjelacite e il Borussia Dordul, chest ultin vincidôr cence rivâi dal premi dal public.

Ma in bande di cheste terne dal podi al è une vore di altri di segnalâ, a tacâ dal 0 fat dal Real Cocâl, strac, che nol à rivât a tignî bot ae tension dai mês finâi, o ancje il pas fals dal Lupusinfabula, che dopo un pâr di mês a nivei alts al à tirât il flât.

Il Volketitrei-Liga e il Copasse blu si confermin simpri te part alte de classifiche, dulà che al torne a meti il nâs ancje il Sporting Brugnul.

Ma pocjis cjacaris e viodin la classifiche gjenerâl, che e viôt une situazion pôc ingredeade ma in ogni câs avincente. Vele chi:

Il Cjicechepicjedispicjelacite al à metude une buine çate partore dal titul di CorseCurte, ma nol à ancjemò vinçude in maniere matematiche, stant che al è denant di dome 11 ponts dal Borussia Dordul, scuadre plui in forme in chest finâl di campionât. Un pas fals e al è pront a profitâ. Stesse cuistion par il tierç puest dulà che la marce regolâr dal Volketitrei-Liga e à sul cuel il flât dal Atletic Gjatui, fresc di sorpàs dal Real Cocâl, che però nol sbandone ancjemò lis sperancis di podi, ancje se ridotis.

Plui stacâts il Copasse Blu, il Lupusinfabula e il Sbreghebalon si daran bataie in te ultime zornade par rivâ subit daûr dai prins.

Insome… La ultime zornade e decidarà une vore di posizions in classifiche.

E tal Fantacorsecurte? Ben po… li o vin la gare plui scombatude!

Noemi Salva e je tornade in teste, ma dome doi ponts denant di Nene, che e je stade cjapade inte seconde posizion de Gjatemarangule. Chestis trê feminis aromai o podìn dî che a saran chês che si contindaran la vitorie finâl inte competizion de zurie dai letôrs… Dut al è inmò in bal.

E intant che a rivin lis contis a teme di “nêf” dal mês di Dicembar us saludìn e us disin ancje che… a stan par rivâ grandis gnovis!!!