CorseCurteNovembar#20 – Un amôr insumiât

#20 – Un amôr insumiât

Alice e jere stufe dai oms, propit stufe. Stufe des fufignis che i disevin e stufe di viodiju a sparî. Un le veve tradide cu la sô amie. Un al jere simpri vie tal forest e al pensave prin ae cariere e dopo a jê. Un al stave ben cun jê ma nol jere in stât di vê “relazions significativis”. Cuissà ce che al voleve dî.
A jê i sarès plasût plui di dut chest: stâ distirâts parsore di un prât a cjalâ i nûi di Avrîl, contents di jessi insiemi, e gjoldi il soreli e la ploie.
Ma se no lu cjatave za fat, e podeve fâlu jê! Alice e jere bravissime a impastâ, a fâ pan e fuiacis, ducj lu savevin. Un morôs bon come il pan e dolç come la mîl, parcè di no?
Cussì une sere e sielzè la farine plui fine, la spongje plui frescje, il zucar plui cjandit, il levan plui lizêr. Ju voleve impastâ di sere parcè che al è di sere che nus vegnin incuintri i siums.
La farine e il zucar si misturavin intun polvar fin tant che nêf a pene colade, la spongje disfate i slissave la piel des mans. I dêts di Alice si movevin fuarts e dolçs tal stes timp. I ûfs a leavin dut, il levan si miscliçave: a planc a planc si faseve e e cresseve la paste.
Cumò lis mans di Alice a sfreolavin l’impast, fof e lustri, ce a planc scuasit par cjarinâlu, ce cun fuarce par che al jevàs miôr.
Dongje di jê, la stue clipe e spietave. L’om di pan nol podeve jessi pront subit, al coventave ancjemò timp. Alice e varès metût l’impast tal for distudât, e lu varès lassât tal clip dute la gnot.

Ma no rivave a durmî, cussì e le fûr tal zardin. Un cîl infinît e cence lune parsore di jê, miârs di stelis a faliscjavin tal neri. La Stradalbe e traviersave l’orizont tant che un flum cidin.
Alice no durmive, ma cui vôi vierts si insumiave dal so amôr. Al cricâ dal dì e varès savût se il so sium si sarès inverât.
Ma se i lave strucje, e varès simpri podût mangjâlu.

di ***
#1***