CorseCurteOtubar#20 – La mê pôre

#20 – La mê pôre

O ai une pôre, e je rivade une sere dal Bosc Neri, chel a pene fûr dal paîs di Lampac, dulà che o soi vignude a stâ za un an indaûr.
O vevi sielzude la ultime cjase dal paîs, pardabon un bon afâr. O ai domandât a la agjente imobiliâr se chel bosc che si viodeve insom dal prât daûr de cjase, cussì scûr, cussì cidin, al jere pericolôs. Ma figurìnsi! Anzit, une cjase cussì, “immersa nella natura”, e jere ideâl par me, e varès podût dâmi “una vita fuori dagli schemi”. Propit ce che o cirivi.
Mi soi trasferide a Lampac vie pal Istât. Une sere di Otubar o ai sintût un cisicâ, un businôr, un talpetâ… O ai cirût daûr de cjase fin che le ai cjatade: lungje un braç, nere e pelose, cun vôi grancj e sgrifis lincinadis. Si remenave come che e fos cjapade intun tramai. Cuant che mi à viodude si è tacade inte gjambe e a chel pont o ai scugnût puartâle in cjase cun me, par cirî alc par parâle vie. Ma jê, a pene che o ai metût pît dentri de cusine, e je scjampade e si è platade sul solâr!
Tal imprin o speravi che e les vie di bessole, o lassavi la puarte vierte ancje vie pe gnot, ma il dì dopo o sintivi a vuicâ, a ciulâ e o savevi che e jere ancjemò li.
O pensavi simpri a jê. Parcè jerie rivade propit li di me? Ce volevie? O ai capît ce specie di pôre che e jere: la pôre di no jessi adeguade. E o ai tacât a sintî lis sôs sgrifis ancje cuant che no jeri a cjase. Il so ciulâ mi businave tes orelis cuant che o fasevi cualchi falope.
Un dì o ai dit a mieze bocje che o volevi lâ vie di li: mi à sgrifade ducj i braçs e mi à fate inçopedâ.
Un gno amì al à viodudis lis sgrifadis e al à dit che le varès parade vie lui. E pûr ancje une bestie cu lis sgrifis si rive a cjareçâle, e cuant che o jeri avilide no jerie vignude dongje come par consolâmi? O ai parât vie l’amì e i ai dit che al leve dut ben e che no mi coventave nuie.

di Stralunade (Atletic Gjatui)
#1410