Daûr di une liende popolâr une vore antighe, «el lobizón» al è il setim frut mascli consecutîf, che i vinars di lune plene si stramude intun lôf.
Cheste liende za e esisteve inte mitologje greghe: si contave la metamorfosi di un om, Licaon, intun lôf. Il mît al podarès jessi rivât te Penisule Iberiche cui visigôts, ator pal secul V. E je cjatâde intun grum des contis dal nord de Spagne, soredut in Galizie. Al è probabil che lu vedin puartât in Americhe i spagnûi tant che i portughês. Si pense che la peraule «lobizón» in Argjentine e in Uruguai e vegni cjapâde dal portughês “ lobishomem”, stramudâde dal latin «lupus homem».
Di bande dai «indios guaraníes», che a àn popolât il teritori uruguaian par cetant timp, si contave che une biele fantate – Keraná – e jere masse pucefadiis e biel insumide. Mai e balave par ringraciâ i favôrs dai spirts dal ben e alore e je stade puartade vie dal diaul Taú. E à vût cun lui siet fîs. Intant, Angatupyry – un spirt di justizie – i à fat vignî dongje une maledizion: ducj i fruts a saràn mostris, une vore bruts. Chescj fruts – ducj masclis – a son stâts nomenâts : YeyuYaguá, MboiTuí, Moñai, YasyYateré, Kurupí, AóAó e finalmentri Huisô o Luisô. Chest setim al sarès stât propite un om-lôf.
Po dopo, cheste liende e ven slungjade e alore «el lobizón» al è deventât un om ordenari – simpri nassût setim fi mascli dentri de sô famee – che ogni vinars, tal amont, al ven smudât intun lôf (o ancje intun cjan), i vegnin luncs i cjavei, lis çatis e i dincj. Il mudament al è avonde dolorôs e al è un segret platât. Al cricâ dal dì, al cjaparà di gnûf la sô forme umane.
di Pablo Martres
