CorseCurteOtubar#13 – Pôre di mûl

#13 – Pôre di mûl

Tita, gno nono bis, persone di famee che e stave ben, influente e une vore stimade tal paîs, al è stât Sindic tra la fin dal Votcent e i prins agns dal Nûfcent.
Jo no lu ài cognossût, ma di lui mi à dit alc une sô gnece, cusine drete di mê mari, che si ben in là cui agns, e ricuarde come fos îr ce che i contave so pari.
Memorabile e je la croniche tramandade de zornade de sô invistidure a Sindic.
Il nono bis, om di biele presince, alt di stature, cu la barbe e i cjavei rossits, in che dì si jere metût in pompe magne cun tant di marsine, cane e baguline.
Il program al proviodeve di rivâ in Comun, cul birocin tirât de sô cjavalute, ma cheste, jù pe gnot, e veve vût une coliche e a matine no jere ancjemò tornade in sest.
Al coventave duncje un altri cjaval, ma dulà mai cjatâ un altri cjaval? A chei timps in paîs no ‘nd jerin altris bestiis di chê raze. E cussì Tita al à scugnût contentâsi dal mûl di un cognossint, un nemâl alt sù par jù come un cjaval e che al podeve ben figurâ.
Intant te place si jerin inschiriadis lis massimis autoritâts dai dintôrs in spiete dal so rivâ.
Un frut al jere stât mandât indenant in avîs dal moment just par dâ il vie ae parade.
Al berli “al rive, al rive”, la bande, bot e sclop, e tacà a sunâ.
Il mûl, spaurît di chel davoi, si metè a cori come un sfolmenât tra il fuifui gjenerâl.
Tita, pierdude la baguline, colade la cane, i cjavei drets, al ve il so biel da fâ par rivâ a fermâlu.
Smontât dal biroç, dut dispetenât e impolvarât, nol veve muse di cristian.
Sistemât pe miôr spolvarantsi cu lis mans, recuperade la baguline e tirade sù la cane ridote a  cicimbele, stant che il mûl si jere calmât e ni lui ni il birocin a vevin nuie di rot, al fo invidât a tornâ a fâ la jentrade, ma… cence bande.
Al che Tita al taiâ curt: – Nancje pai siet sintiments; jo o ven dilunc a pîts e no stait plui fevelâmi di mûi, in vite eterne amen”.
Cussì e somee che e sedi lade; in ogni câs, Tita cussì le à passade ae storie, cence pôre di fâ brute figure.

di ***
#1***

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît