#10 – Cente di leons
O soi intune cente di fîl tant che chei che si doprin par meti dentri i animâi dumiestis. Ma inte cente no son cjavai o vacjis: a son cetancj leons sparniçâts par tiere. In maniere insolite a son cidinis, cuiets, cualchidun al duar, altris a son sveâts, ma intun stât di calme tant che chei di dîs di cjalt african. O cjamini cun pas curts, dret come un pichet, cjalant a drete e a çampe, scaturît di pôre e al stes timp maraveât de circonstance: al pararès tant che o fos invisibil, in aparence nissun di lôr al pâr viodimi.
O soi sul sigûr! Soio? Une prede cussì facile e sarès stade scanade a cheste ore! No son bramôs: a devin vê mangjât masse e a son in letarc post-prandiâl mi dîs… al e miôr no spandi adrenaline: lis bestiis a sintin l’odôr de pôre, sta cidin!
Un mascli mi rileve e al môf la sô criniere viers di me: mi mangje cui voi e o lu lassi fâ: o ai di deventâ vitime… dulà âstu lassât il cjâf?… si môf indevant!… la bestie e al continue a cjalâmi e dome la sô code si môf tant che un metronom… paff… un piçul nûl di polvar si jeve sù… o voi dongje di lui… paff…
«Sestu di bessôl?… puedio fâti compagnie?»
Lis domandis mi butin fûr dal ricuart de sium di nossere.
O stoi tornânt a cjase daspò gjinasi e denant di me al è il gno torment. Lui al è lât dongje di me. Mierde!. O soi colât ancjemò.
No… o dîs jenfri i dincj… il cjâf al è lât jù cun vergogne, ma la bocje di ridi mi tradìs.
La rispueste vergognose e flape e il ros in muse lu fasin sclopâ di ridi e al dûl piês che un pugn te nâs…
Fenoli!
Il colp te cope mi fâs lâ a fruçons: o volevi jessi il sogjet de sô atenzion e propit cumò o ai cjapât dome il so dispresit.
Lui al saveve che mi jeri inmagât, lui al saveve che lu viodevi cui voi di agnelut decapitât cuant che o jerin in classe. Lui al è dut ce che no soi: sigûr, atletic, ferbint e fuart. O soi di clape di cervielons e lui al aparten a chê dai figos: o sin dal dut opuescj.
O continui a cjaminâ lassant la burlade che e beche daûr, ma e za dentri di me e al dûl plui che il jessi stâts refudât.
E va piês cun piês a inamorâsi dal nestri boie.
di ***
#1***
