CorseCurteOtubar#08 – Lis pôris di Gjovanin

#08 – Lis pôris di Gjovanin

Gjovanin al veve pôre di ducj e di dut.

A dutrine si spaventave cuant che al sintive  che il catechist ur diseve: – Viodêt di cjaminâ drets dilunc la vuestre vite che se no us spietin lis flamis dal Infier!
A Gjovanin lis flamis dal Infier i fasevin ricuardâ San Laurinç martar, muart brusât intune gridele, sô none e jere une vore devote di chel santut.

O pûr come in chê volte che intant che al durmive, chel mataran e fûr cul cit di so barbe Bortul, i veve metût un surisin muart tal jet .

Si ricuardave di chê joibe grasse che al jentrà vaint in cusine intant che sô mari e frizeve i crostui.
– Ce âstu gno ninin?
– E je une strie tal curtîl che mi cor daûr .
– Va, va, e je tô santule mascarade, clamile, dîsi che jentri.

Il ricuart dal catechist, di so barbe Bortul, di sô santule e di tancj altris acjadiments vivûts dilunc de sô infanzie a forin lassant profondis olmis tal so  caratar, cussì pôc a pôc, si le formant in Gjovanin une personalitât temerose e spaventade, a tal pont che, za in etât adulte, cuant che al cjaminave par strade, no i plaseve che cualchidun al les daûr di lui, lu tignive iniment cu la code dal voli intardant il pas, lassantlu passâ devant, cussì al podeve controlâlu.

Gjovanin, finide la sô zornade di lavôr te açalarie, si deve une lavade di mans ae svelte e cence pierdi altri timp al inforcjave la vecje biciclete par tornâ a cjase. Fadiant cun lis rivis  sù e frenant tes rivis in jù, al passave par borcs e borgadis, paîs e paisuts e ogni sante dì Gjovanin al passave disint un recuie devant dai varis cimitieris,  che cuasi in ducj, devant des jentradis  cence parêts dulintor, si viodevin une rie di ciprès che cidins cidins a vuardeavin chel cidinôr.

E cuant che i siei amîs i domandavin: – Ma no âstu pôre di pasâ a straoris par chei lûcs li?
Gjovanin ur rispuindeve con bocje di ridi: – I muarts no mi fasin pôre, o ai pôre dai vîfs!

di ***
#1***

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît