La cjace

A si jere rivâts al 1962 cun le sô crisi che e stave par puartâ il mont ae ultime vuere de sô storie. Intant che, a Cuba, i americans a jerin aes stretis cui rus, sul Canadà a si pandevin lis incursions dai bombardîrs sovietics. Clark e il so sorestan a seguivin lis operazions in te sale dal comant de Royal Canadian Air Force.
“Par cumò a stan doprânt dome i TU-95 e i M-4, i nestris a rivin a tignîju sot tîr cui CF-100 e i F-86.”
“Nuie bombardîrs super sonics par cumò.”
“Spiete a dîlu, a stan segnânt trê che a tirin vie un pôc masse par jessi la solite robe.”
“A àn mandât i CF-101 ma, di chei trê, un al somee che al tiri vie ancjemò di plui.”
“Sacrabolt, plui di un Vodoo!”
“Bisugne clamâlis!”
I doi a intervegnin inte sale comant, che e jere cetant vivarose. A cuietin ducj e a spieghin che a àn un aparât speciâl. I operadôrs dai radar a vegnin istruîts a vuidâ l’aparât segret, in curt a ricognossin lis proceduris dal sisteme Astra e in tal ambient e cres la fiducie.
Clark si met in contat cu la radio di Julia e Sasha: “Cemût mai che o sês za partidis, e i ordins?”
“Se o stavin a spietâ voaltris… o vês di savê che nus àn mandât doi TU-22 bombardîrs da mach 1,5 e nuie di mancul che un Myasishchev M-50, inmagjinâisi un B-52 che al tire a mach 2”.
Inte sale dal comant ducj a tasin. Un uficjâl al fâs al sorestan di Clark: “Lis dôs russis, o vês dât il nestri miôr aparât a dôs russis?!”
Clark al interven: “A son perfetementri cualificadis e no àn nissune voie di tornâ là che a jerin!”
Dopo al cjôl il microfon: “Julia, Sasha, i TU-22 o rivin a cjapâju, voaltris concentrâisi sul M-50.”
Sasha al sburte indenant la manete e si fâs dongje dal M-50 ma, cuant che i stave sot al si inacuarç di une sdrasse di faliscjis che a vegnin viers di lôr, al scugne fâ une manovre secje.
“Ohu! Ce fastu?”
“Al à un canon in code!”
“Che al sedi rivât a scjampâ?”
“Al à provât ma noaltris o vin plui cuote, e soredut, plui potence, cetante plui potence!”
Cu la potence dai siei Orenda Iroquis il CF-105 al rive a puartâsi sot dal M-50 stânt fûr dal canon di code. I doi avions a son di flanc, alore Sasha al fâs segnâi ai rus di chel altri avion, dopo i indiche di viodi sot “Viers il scompart” al fas a Julia, al incline l’avion e al mostre i trê missii sparrow pronts par jessi tirâts.
I pilots dal bombardîr ju stan cjalânt di brut. Dopo a si metin parsore dal bombardîr, prontis a butâlu jù o a butâ jù i siei missii se a ju ves tirâts.
Ma chê no jere la soluzion: si ancje a vessin tirât jù il bombardîr, i restavin dome doi missii, se a vessin mancjât un bersai a podevin dome lâi intor.
In ogni câs, in chê situazion, butâ jù un bombardîr sovietic al varès fat tacâ la vuere. Bisugnave che il bombardîr al si ritiràs.
A un ciert pont, i sovietics a domandin assistence e l’Arrow al pues compagnâ il bombardîr fûr dal spazi canadês. Ni il CF-105, ni il M-50 a son mai plui stâts doprâts.

di Luche Bagnarol
#1358

1 comment